Muhammad Rafiq Tarar was President of Pakistan from 1998-2001. He died on March 7, 2022.
پاکستان کے سابق صدر محمد رفیق تارڑ کا 7 مارچ 2022ء کو انتقال ہوگیا۔۔!
محمد رفیق تارڑ نے یکم جنوری 1998ء کو پاکستان کے 9ویں صدرمملکت کے عہدے کا حلف اٹھایا تھا۔ وزیراعظم میاں محمد نواز شریف کی مسلم لیگ کی حکومت کے ایک انتہائی وفادار نمائندے کے طور پر صدارتی انتخاب میں 457 میں سے 374 وؤٹ حاصل کیے۔ صدارت کے عہدے پر 20 جون 2001ء تک فائز رہے جب فوجی آمر جنرل پرویز مشرف نے ملک بھر میں ایمرجنسی لگا کر تارڑ صاحب کو عہدہ صدارت سے سبکدوش کرکے خود قبضہ کرلیا تھا۔
محمد رفیق تارڑ بطور صدر مملکت ، وفاق کے نمائندے تھے جو پارلیمانی نظام میں ایک بے اختیار اور علامتی عہدہ ہوتا ہے۔ انھوں نے اپنی پارٹی اور وزیراعظم میاں محمد نواز شریف کی خواہش پر پاکستان کے آئین میں 13ویں ، 14ویں اور 15ویں ترامیم پر باآسانی دستخط کر دیے تھے جس نے 8ویں ترمیم کے ذریعے ملنے والے صدر کے ناجائز اختیارات کو ختم کر دیا تھا۔
محمد رفیق تارڑ ، 2 نومبر 1929ء میں پیر کوٹ (گکھڑ) کے ایک زمیندار چوہدری سردار خاں تارڑ کے ہاں پیدا ہوئے۔ انٹر تک تعلیم ، گکھڑ میں حاصل کی اور 1951ء میں پنجاب یونیورسٹی لاء کالج سے ایل ایل بی کیا۔ گوجرانوالہ ضلع کچہری میں پریکٹس شروع کی۔ 1975ء میں لاہور ہائیکورٹ میں بطور جسٹس تعینات ہوئے۔ 1989ء سے 1991ء تک اہور ہائی کورٹ کے 28ویں چیف جسٹس رہے۔ 1991ء سے 1994ء تک سپریم کورٹ آف پاکستان کے سینئر جسٹس رہے۔ اس دوران 1992ء میں بطور مسلم لیگی رہنما سینیٹر منتخب ہوئے۔ 1998ء سے 2001ء تک صدر مملکت منتخب رہے۔ 7 مارچ 2022ء کو 92 سال کی عمر میں انتقال ہوا۔
پاک میگزین ، پاکستانی تاریخ پر اردو میں ایک منفرد ویب سائٹ ہے جس پر اہم تاریخی واقعات کو بتاریخ سالانہ ، ماہانہ ، ہفتہ وارانہ ، روزانہ اور حروفانہ ترتیب سے چند کلکس کے نیچے پیش کیا گیا ہے۔ علاوہ ازیں اہم ترین واقعات اور شخصیات پر تاریخی اور مستند معلومات پر مخصوص صفحات ترتیب دیے گئے ہیں جہاں تصویر و تحریر ، ویڈیو اور دیگر متعلقہ مواد کی صورت میں محفوظ کیا گیا ہے۔ یہ سلسلہ ایک انفرادی کاوش اور فارغ اوقات کا بہترین مشغلہ ہے جو اپنی تکمیل تک جاری و ساری رہے گا ، ان شاء اللہ۔۔!
پاکستانی فلموں ، فنکاروں اور فلمی گیتوں پر ایک منفرد اور معلوماتی سلسلہ
