"سندھی" (Sindhi)، پاکستان کی تیسری سب سے زیادہ بولی جانے والی زبان ہے۔

"ہندیورپین" (Indo-European) زبانوں میں "ہندآریائی" (Indo-Aryan) گروپ سے تعلق رکھنے والی "سندھی" زبان کا نام دریائے سندھو سے ماخوذ ہے جس کے ڈیلٹا کے گرد خطہ سندھ اور اس میں سندھی آباد ہیں۔ سندھی، (اردو کے ساتھ) صوبہ سندھ کی سرکاری زبان ہے۔

2023ء کی مردم شماری کے مطابق، پاکستان میں سندھی زبان بولنے والوں کی تعداد 14 فیصد یا 3 کروڑ 44 لاکھ ہے جو پنجابی اور پشتو کے بعد تیسرے نمبر پر سب سے زیادہ بولی جانے والی زبان ہے۔ تھرپارکر، سجاول، دادو، لاڑکانہ، خیرپور، قمرشہدکوٹ، ٹنڈومحمدخان، کشمور، بدین اور عمرکوٹ کے اضلاع میں 90فیصد سے بھی زائد سندھی بولی جاتی ہے جبکہ آبادی کے لحاظ سے خیرپور سب سے بڑا سندھی شہر ہے۔

سندھی زبان کی تاریخ

"سندھی زبان"، کی تاریخ بھی ہندی/اردو، پنجابی اور گجراتی کی طرح پانچ ہزار سال پہلے کی وادی سندھ کی تہذیب سے ملتی ہے۔ ساڑھے تین ہزار سال قبل شمالی ہند کی قدیم زبانوں "سنسکرت، پالی ، ثانوی پراکرت، اور اپبھرمشا" سے پیدا ہوئی اور سترہ سو سال پہلے اس پر عربی اور فارسی کے گہرے اثرات مرتب ہوئے۔

عربوں نے 711ء میں محمدبن قاسمؒ (715-695ء) کی قیادت میں ہندوستان پر واحد حملہ کیا اور سندھ کو ملتان سمیت فتح کرلیا تھا۔ اس طرح سے سندھ پہلا صوبہ تھا جس پر اسلامی اثرات مرتب ہوئے اور یہ خطہ پنجاب سے تین سو سال اور دہلی سے پانچ سو سال پہلے مسلمان ہوا تھا۔ اس کے باوجود 1843ء تک سندھی زبان، مختلف برہمنی (یا ہندوستانی) رسم الخط میں لکھی جاتی تھی۔ 1848ء میں انگریز گورنر جارج کلرک نے سندھی کو صوبہ کی سرکاری زبان قرار دیا اور 1853ء میں موجودہ سندھی رسم الخط کا اجراء ہوا جو عربی طرزِ تحریر نسخ میں لکھا جاتا ہے۔

سندھی زبان میں مطبوعات کا آغاز بمبئی کے محمدی پریس میں 1867ء میں شروع ہوا جبکہ برصغیر پاک و ہند میں قرآنِ مجید کا پہلا ترجمہ بھی سندھی زبان میں 1870ء میں آخوند عزاز اللہ متلوی (1824-1747ء) نے کیا تھا۔

سندھی زبان کے سب سے بڑے صوفی شاعر شاہ عبداللطیف بھٹائیؒ (1752-1689ء) کا کلام "شاہ جو رسالو" کی صورت میں مرتب کیا گیا جس میں سندھی لوک کہانیوں اور سندھ کی ثقافتی تاریخ کو محفوظ کیا گیا ہے۔ اس کے علاوہ سندھی زبان میں شعر و ادب کے علاوہ ریڈیو، ٹی وی، فلم اور لوک فنکاروں کا بڑا کام رہا ہے۔

سندھی حروفِ تہجی

سندھی زبان میں 52 حروفِ تہجی ہیں جو دیگر زبانوں کی نسبت بہت زیادہ ہیں۔ (انگلش میں آدھےیعنی صرف 26 ہیں!)

سندھی زبان کا تحریری ثبوت 15ویں صدی میں ملتا ہے جب اس کو "دیوناگری" کے علاوہ "لنڈا رسم الخط" کی دو ترقی یافتہ شکلوں "خداآبادی" اور "شکارپوری" کی مدد سے تیار کیا گیا تھا۔ 19ویں صدی میں انگریز حکمرانوں کے ایما پر ابوالحسن السندی نے عربی طرزِ تحریر میں متعدد اضافے کر کے سندھی حروفِ تہجی کو روشناس کروایا جو دیگر علاقائی خطوط "کھوجکی" اور "گرومکھی" سے ملا ہوا ایک میعاری رسم الخط قرار پایا۔

سندھی حروفِ تہجی میں خاصا عدم توازن پایا جاتا ہے اور پہلی بار پڑھنے (یا سیکھنے) والا چکرا جاتا ہے۔ اردو کے ابتدائی دور میں ان حروف پر چار نقطے ہوتے تھے جن کی جگہ "ط" اور "ھ" نے لے لی لیکن سندھی زبان میں ایسا نہیں ہوسکا۔ مثلاً مرکب حروف میں سے "جھ" اور "کھ" کے لیے تو اردو/پنجابی کی طرح "ھ" کا استعمال ہوتا ہے لیکن "بھ"، "تھ"اور "چھ" کے لیے چار چار نقطے استعمال ہوتے ہیں۔ "ٹھ"، "دھ" اور "ڈھ" کے لیے دو دو لیکن "ڈ" کے لیے تین اور "ڑ" کے لیے چار نقطے ہیں۔ "ف" پر چار نقطے ڈال کر "پھ" بنایا جاتا ہے لیکن "ک" کو دو مختلف طریقوں سے لکھ کر "ک" اور "کھ" کی آوازیں بنتی ہیں۔

سندھی زبان کے مخصوص تلفظ کے حروف"ب"، "ج" اور "گ" پر دو دو اضافی نقطے لگانے سے جو تلفظ بنتا ہے، اس کا فرق کرنا مشکل ہوتا ہے۔ دو حروف "ج" اور "گ" پر تو دو دو نقطے عمودی اور متوازی ڈالے گئے ہیں اور ان حرف کی کل تعداد چار چار ہے۔ سندھی میں "بڑی یے" نہیں ہے لیکن "ن" میں "ط" لگا کر "نڑ" کی مخصوص آواز بنائی گئی ہے۔

سندھی بولیاں

سندھی زبان، صوبہ سندھ کے علاوہ بلوچستان، راجستھان اور گجرات کے علاقوں تک پھیلی ہوئی ہے اور اس کی مختلف بولیاں/لہجے ہیں جن میں "وچولی، اترادی، لاری، سرولی، لاسی، فراقی، تھریلی اور سندھی بھیلی" قابلِ ذکر ہیں۔ ان کے علاوہ بہت سی گجراتی اور راجستھانی بولیاں بھی سندھ میں بولی جاتی ہیں جو عام طور پر ہندوستانی مہاجرین بولتے ہیں۔

وچولی (Wacholi)، سندھی زبان کی ایک بولی ہے جو جو وسطی سندھ اور حیدرآباد کے علاقوں میں بولی جانے والی "سٹینڈرڈ سندھی" ہے۔

اترادی (Utradi) ، سندھی زبان کی ایک بولی ہے جو شمالی سندھ کے علاقوں، لاڑکانہ ، شکارپور اور سکھر وغیرہ میں بولی جاتی ہے۔

لاری (Lari)، سندھی زبان کی ایک بولی ہے جو جنوبی سندھ کے علاقوں، کراچی ، ٹھٹھہ اور بدین وغیرہ میں بولی جاتی ہے۔

سرولی/سرائیکی یا ابھیجی (Saroli)، سندھی زبان کی ایک بولی ہے جو صوبہ پنجاب اور بلوچستان سے متصل شمالی سندھ کے علاقوں جیکب آباد اور کشمور کے اضلاع میں بولی جاتی ہے۔

"لاسی" (Lasi) ، سندھی زبان کی ایک بولی ہے جو مغربی سندھ کے علاوہ بلوچستان کے علاقوں لسبیلا، حب اور گوادر وغیرہ میں بولی جاتی ہے۔

سندھی زبان کی دس کے قریب بولیاں ہیں جن میں سے ایک "لاسی" ہے جو "جدگالی" یا "نماڑی" بولی کے قریب ہے اور جس میں فارسی کے علاوہ بلوچی الفاظ بھی ملتے ہیں۔ سندھی رسم الخط استعمال ہوتا ہے جو صرف خطِ نسخ میں لکھا جاتا ہے۔

فراقی (Faraqi)، سندھی زبان کی ایک بولی ہے جوبلوچستان کے شمال مشرقی اضلاع میں کچھی کے میدانی علاقوں میں بولی جاتی ہے۔

تھریلی (Thareli)، سندھی زبان کی ایک بولی ہے جو سندھ کے شمال مشرقی صحرائے تھر کے علاوہ راجستھان ، ہندوستان کے جیسلمیر علاقوں میں بولی جاتی ہے۔

"سندھی بھیلی" (Sindhi Bhil)، سندھی زبان کی ایک بولی ہے جو صوبہ سندھ اور بلوچستان میں بولی جاتی ہے۔

"سندھی بھیل" کو اکثر "لاسی" کے ساتھ ایک الگ زبان کے بجائے سندھی بولی کہا جاتا ہے۔ یہ زیادہ تر بدین اور ٹنڈو الہ یار کے علاقوں میں ہندوؤں کی زبان ہے۔

"جدگالی" (Jadgali)، سندھی زبان کی ایک شاخ ہے جس کو "نماڑی" بھی کہتے ہیں۔۔!

"جدگالی یا نماڑی"، سندھی زبان کی ایک اور شاخ "لاسی" سے بھی ملتی ہے جس کو "جدگالی" قوم کے لوگ بولتے ہیں۔ یہ لوگ کبھی سندھ میں آباد تھے لیکن وہاں سے ملک بدر ہوئے اور بلوچستان اور ایران کے ساحلی علاقوں میں آباد ہوئے۔

"کچھی" (Kutchi)، سندھی زبان کی ایک بولی ہے جو سندھ اور رن کچھ کے علاقے میں بولی جاتی ہے۔

"کچھی بولی" کے 80 فیصد الفاط سندھی زبان سے ملتے ہیں جبکہ اس پر گجراتی اور اردو/ہندی کے اثرات بھی پائے جاتے ہیں۔ اس کی ایک شاخ مشرقی افریقہ کے ممالک میں بھی ملتے ہیں جس کو " کچھی سواحلی" کہا جاتا ہے جو ہجرت کے نتیجے میں وجود میں آئی۔ یہ بولی پاکستان میں سندھی رسم الخط میں لکھی جاتی ہے جبکہ بھارت میں گجراتی رسم الخط میں۔

"بھایا" (Bhaya)، زیریں سندھ کے میرپور خاص کے علاقے میں بولی جانے والی ایک نیم مردہ زبان ہے۔۔!

"ہند آریائی" (Indo-Aryan) زبانوں کے گروپ سے تعلق رکھتی ہے اور پڑوسی زبانوں سے خاصی مماثلت ہے۔ غیرتحریری زبان ہے اور ایک ہزار سے کم بولنے والے ہیں۔

"ڈھاٹکی " (Dhatki) کو "ڈھاٹی" یا "تھری بولی" بھی کہا جاتا ہے جو صحرائے تھر میں صوبہ سندھ کے علاقہ تھرپارکر اور عمرکوٹ کے اضلاع کے علاوہ بھارتی راجستھان میں بولی جاتی ہے۔

"ڈھاٹکی"، سندھی زبان کی ایک بولی ہے جس کو اہلِ پنجاب بھی باآسانی سمجھ سکتے ہیں۔ "مارواڑی" سے بھی ملتی ہے اور مختلف لہجوں میں تقسیم ہے۔ بولنے والوں کی اکثریت مسلمان ہے اور لکھنے کے لیے سندھی رسم الخط استعمال ہوتا ہے۔