پشتو (Pashto)، پاکستان کی 18 فیصد آبادی کی مادری زبان ہے۔۔!

"ہند یورپین" (Indo-European) زبانوں کے خاندان کی ایک شاخ "ہند ایرانی" (Indo-Iranian) سے تعلق اور "ہندآریائی" زبانوں سے قربت رکھنے والی "پشتو یا پختو زبان" کو دنیا بھر میں چھ کروڑ سے زائد افراد بولتے ہیں۔

2023ء کی مردم شماری کے مطابق، پشتو، پنجابی کے بعد پاکستان کی دوسری بڑی مادری زبان ہے جس کو 4 کروڑ 36 لاکھ افراد بولتے ہیں۔ یہ تعداد افغانستان کی ڈیڑھ کروڑ پشتون آبادی سے قریباً تین گنا زیادہ ہے۔

گزشتہ چار دھائیوں میں پاکستان میں پشتو بولنے والوں کی تعداد دگنی سے بھی زائد ہوچکی ہے جس کی وجہ بڑی تعداد میں افغان مہاجرین ہیں جو مستقل طور پر پاکستان میں مقیم رہے۔ افغانستان میں "دری زبان" کے ساتھ پشتو بھی ایک سرکاری زبان ہے اور پاکستانی بارڈرز کے ساتھ خصوصاً کابل اور قندھار تک کے علاقوں میں پشتون عوام کی اکثریت آباد ہے۔

پشتو آبادی کی تقسیم

پشاور (صوبہ خیبرپختونخواہ)، کوئٹہ (بلوچستان)، کابل اور قندھار (افغانستان)، پشتو بولنے والے "خالص" بڑے شہر ہیں لیکن کراچی (سندھ) میں پشتو بولنے والوں کی تعداد کسی بھی شہر کے مقابلے میں سب سے زیادہ ہے جو مقامی اردو آبادی کے بعد دوسرے نمبر پر آتی ہے۔

صوبہ خیبرپختونخواہ میں افغان بارڈر کے ساتھ ساتھ لوئر دیر سے لکی مروت کے دس اضلاع میں قریباً سو فیصدی آبادی کی مادری زبان پشتو ہے جبکہ آبادی کے لحاظ سے پشاور، مردان، سوات، چارسدہ، صوابی، لوئر دیر، نوشہرہ، کوئٹہ، بنوں اور بجنور، دس بڑے شہر ہیں۔ صوبہ بھر میں سب سے کم پشتو بولنے والوں کی تعداد، وادی چترال، کوہستان اور ہزارہ ڈویژنوں میں ہے جہاں بالترتیب کھوار، کوہستانی اور ہندکو بولی جاتی ہیں۔ صوبہ بھر میں کل 29 زبانوں کا ذکر ملتا ہے۔

صوبہ خیبر پختونخواہ میں 80فیصد، بلوچستان میں 35فیصد اور اسلام آباد میں 20فیصد افراد کی مادری زبان پشتو ہے۔ سندھ میں مجموعی طور پر 5فیصد اور پنجاب میں صرف 2 فیصد پشتو بولنے والے ہیں۔ ان کے علاوہ لاکھوں پشتون، بیرونِ ملک بھی مقیم ہیں۔

"پشتون" اور "پختون" میں کیا فرق ہے؟

عام طور پر "پٹھانوں" کو "پشتون" اور "پختون" کے ناموں سے بھی پہچانا جاتا ہے جبکہ "افغان"، افغانستان کے لوگوں کو کہا جاتا ہے حالانکہ یہ چاروں نام، پشتو زبان بولنے والوں کے ہیں۔ "پشتون" اور "پختون" کے نام اصل میں دو قبائل کے لہجے ہیں جس کی تفصیل مندرجہ ذیل ہے:

• "خٹک" قبائل "پشتون" ہیں کیونکہ وہ عام طور پر "ژ اور ش" کی آوازیں بولتے ہیں۔ یہ لوگ، وزیرستان، بنوں، ڈیرہ اسماعیل خان کے علاوہ بلوچستان اور افغانستان میں بھی آباد ہیں۔
• "یوسف زئی قبائل"، "پختون" ہیں جو "ژ اور ش" حروف کو "گ، ج اور خ" کی آوازوں سے بولتے ہیں۔ یہ قبائل شمال مشرقی علاقوں یعنی "دیر، سوات، بنیڑ اور باجوڑ" میں آباد ہیں۔

پشتو زبان کی تاریخ

ماہرینِ لسانیات کے مطابق، پشتو زبان، ایک مشرقی ایرانی زبان ہے جو دو ہزار سال قبل دریائے سندھ کے مغربی کنارے آباد آریائی قبائل بولتے تھے جنھیں "ابگان" (افغان، پختون یا پٹھان) کے نام سے جانا جاتا تھا۔ یہ مشرقی وسطی کی دیگر ایرانی زبانوں جیسا کہ "پشتو آوستان"، "باختر"، "خوارزمیان" اور "سغدیان" کے ساتھ ملتی جلتی ہے لسانی طور پر سب سے زیادہ قدامت پسند اور وسیع زبان ہے جس میں یونانی اور سنسکرت زبانوں کے اثرات بھی ملتے ہیں۔ 7ویں صدی کے بعد پشتو زبان میں عربی/اسلامی الفاظ شامل ہوئے۔ دورِ جدید میں پشتو میں انگریزی اور اردو الفاظ بھی آئے ہیں۔

افغان حکمران احمد شاہ درانی (72-1722ء) کے دورِ حکومت میں پہلی بار پشتو، سرکاری زبان بنی۔ اسی دور میں درس و تدریس کے لیے پہلا پشتو قاعدہ بنا۔ پشتو گرامر کی پہلی کتاب 1805ء میں آئی جبکہ پہلی لغت 1808ء میں شائع ہوئی تھی۔

پشتو ثقافت

پشتو تہذیب و ثقافت میں ادبی روایات بہت پرانی ہیں جن میں لوک کہانیاں، کہاوتیں، گیت، رقص اور منظوم کلام شامل ہیں۔ پشتو زبان کے عظیم شاعروں، خوشحال خان خٹک (89-1613ء) اور رحمان بابا (1715-1650ء) نے پشتو زبان پر گہرے اثرات مرتب کیے تھے۔

پشتو زبان میں اخبارات و جرائد کے علاوہ شعر و ادب، ریڈیو، ٹی وی اور فلم بھی مقامی تہذیب و تمدن کی ترجمانی کرتی ہے۔ پشتو، لوک موسیقی کی اپنی الگ پہچان ہے اور خاص طور پر موسیقی کا ایک آلہ "رباب" خصوصی پہچان ہے۔ طبلے کا سٹائل بھی منفرد ہے۔ "خٹک ڈانس" بھی پشتو کلچر کا ایک خاص پہچان ہے۔

پشتو حروفِ تہجی

پشتو حروفِ تہجی میں کل 44 حروف ہیں جو عربی، فارسی اور ہندی حروف کا مجموعہ ہیں۔

پشتو حروفِ تہجی، عربی طرزِ تحریر "خطِ نسخ" میں لکھی جاتی ہے عربی، فارسی اور ہندی حروف کا مجموعہ ہیں۔ تعداد کے بارے متضاد معلومات ہیں، 44 سے 46 تک کے حروف ہیں۔ پشتو گنتی، فارسی طرز پر لکھی جاتی ہے جس میں 4 اور 6 کے ہندسوں کو حرف "ہمزہ" کی شکل میں جبکہ 7 کو عربی کے الٹے 8 کی شکل میں لکھا جاتا ہے۔ پشتو حروفِ تہجی کی موجودہ اصلاح ستر اور اسی کی دھائیوں میں ہوئی جبکہ دورِ حاضر میں سوشل میڈیا پر پشتو زبان کو رومن میں بھی لکھا جا رہا ہے۔

پشتو حروفِ تہجی میں بعض حروف کی مخصوص اشکال اور تلفظ ہیں جن میں مثلاً "ٹ"، "ڈ" اور "ڑ" پر " چھوٹی ط" کی بجائے بالترتیب "ت"، "د" اور "ر" کے حروف کے نیچے ایک چھوٹا سا گول دائرہ لگا دیا جاتا ہے جبکہ "ک" کی کش کے نیچے بھی ایک دائرہ لگا کر "گ" کی آواز بنائی جاتی ہے۔ ان کے علاوہ "ح" کے اوپر تین نقطے "ث" کی، "ح" پر ہمزہ کی علامت "ز" کی، "س" اور "ر" کے اوپر نیچے ایک ایک نقطہ بالترتیب "خ" اور "گ" کی جبکہ "ن" کے نیچے گول دائرہ "نڑ" کی آواز دیتا ہے۔ ان میں سے بیشتر آوازیں، پشتو زبان کی مخصوص آوازیں ہیں جو دیگر زبانوں میں نہیں ملتیں۔

پشتو حروفِ ہجا کی ایک خصوصیت یہ بھی ہے کہ اس میں"ی" کی پانچ اقسام ہیں جن میں سے ایک "بڑی یے" کی آواز بھی ہے۔

پشتو زبان کی بولیاں/لہجے

دیگر بڑی زبانوں کی طرح پشتو زبان (language) کی بھی متعدد بولیاں (dialect) اور لہجے (accent) ہیں جنھیں بین الاقوامی زبانوں کی ویب سائٹ Ethnologue نے تین حصوں، "وسطی پشتو"، "شمالی پشتو" اور "جنوبی پشتو" میں تقسیم کیا ہے۔ پاکستان میں ماہرینِ لسانیات نے پشتو زبان کے مختلف لہجوں کو دو بڑے گروپوں میں تقسیم کیا ہے:

مشرقی لہجے

• "مشرقی لہجوں" کو "پشاوری" اور "خیبر" کے علاوہ "نرم پشتو" (Soft Pashto) بھی کہتے ہیں جو مندرجہ ذیل علاقوں میں بولی جاتی ہے:
  ٭ یوسف زئی پشتو: یہ مالاکنڈ ڈویژن، سوات، بونیر، مردان، اور چارسدہ کے علاقوں میں بولی جاتی ہے۔
  ٭ آفریدی پشتو: یہ خیبر ایجنسی اور کوہاٹ کے علاقوں میں بولی جاتی ہے۔

مغربی لہجے

• "قندھاری" اور "ہراتی" لہجوں کو "سخت پشتو" (Hard Pashto) بھی کہتے ہیں جو افغانستان کے علاوہ پاکستان میں بھی بولے جاتے ہیں۔
  ٭ قندھاری پشتو: یہ سب سے معتدل لہجہ ہے جو اپنی اصل حالت میں ہے اور جنوبی خیبر پختونخواہ اور بلوچستان کے علاقوں میں بولا جاتا ہے۔
  ٭ وزیری پشتو: وزیرستان کے علاقوں میں بولی جاتی ہے۔

وسطی پشتو (Central Pashto)، پاکستان اور افغانستان میں بولی جاتی ہے۔

"وسطی پشتو"کے مختلف لہجے ہیں جنھیں "زدرانی، کراما (کرم ایجنسی)، وزیری (وزیرستان)، خٹک اور بنوسی (بنوں)" کہتے ہیں۔

شمالی پشتو (Northern Pashto)، شمال مغربی اور شمال مشرقی پشتو پر مشتمل ہے۔

"وسطی پشتو"، صوبہ خیبرپختونخواہ کے شمال اور وسطی علاقوں کے علاوہ افغانستان کے مشرقی وسطی علاقے میں بولی جاتی ہے۔ اس کا لہجہ "یوسف زئی" سب سے زیادہ بولا جانے والا لہجہ ہے۔

جنوبی پشتو (Southern Pashto)، جنوب مشرقی افغانستان کے علاوہ بلوچستان میں بھی بولی جاتی ہے۔

"جنوبی پشتو" میں اس زبان کا سب سے معزز لہجہ "قندھاری" ہے جو افغانستان کے بیشتر علاقوں کے علاوہ ایران میں بھی بولا جاتا ہے۔ اسی لہجے میں "کاکڑ، شیرانی اور مروت بیٹانی" کے لہجے بھی آتے ہیں۔

آفریدی (Afridi)، پشتو زبان کی شمالی پشتو یا مشرقی بولی کا ایک لہجہ ہے جو خیبر ایجنسی اور کوہاٹ کے علاقوں میں زیادہ تر آفریدی قبائل بولتے ہیں۔

2018ء کے بعد سے خیبرایجنسی کو صوبہ پختونخواہ کا ایک ضلع بنادیا گیا ہے جو پشاور ڈویژن میں آتا ہے۔ اس میں جمرود کا مشہور زمانہ درہ خیبر بھی آتا ہے اور افغانستان کے بارڈر پر لنڈی کوتل کا سرحدی شہر بھی۔

یوسف زئی (Yusufzai)، پشتو زبان کی شمالی پشتو یا مشرقی بولی کا ایک لہجہ ہے جو صوبہ خیبرپختونخواہ کے شمال علاقوں، مالاکنڈ ڈویژن، سوات، بونیر، مردان، اور چارسدہ کے علاقوں میں بولا جاتا ہے۔

"یوسف زئی قبائل"، "پشتون" کی بجائے "پختون" کہلاتے ہیں کیونکہ وہ "ژ اور ش" حروف کو "گ، ج اور خ" کی آوازوں سے بولتے ہیں۔

قندھاری (Kandahar)، پشتو زبان کی جنوبی پشتو یا مغربی بولی کا ایک لہجہ ہے جو جنوبی خیبر پختونخواہ اور بلوچستان کے علاقوں میں بولا جاتا ہے۔

"قندھاری " کو "پشتو زبان " کا سب سے معتدل لہجہ سمجھا جاتا ہے جو اپنی اصل حالت میں ہے۔

وزیری (Waziri)، پشتو زبان کی جنوبی پشتو یا مغربی بولی کا ایک لہجہ ہے جو وزیرستان کے علاقوں میں بولا جاتا ہے۔

"وزیری پشتو" بولنے والے عام طور پر"خٹک" قبائل ہیں جو "پشتون" کہلاتے ہیں ہیں کیونکہ وہ عام طور پر "ژ اور ش" کی آوازیں بولتے ہیں۔ یہ لوگ، وزیرستان، بنوں، ڈیرہ اسماعیل خان کے علاوہ بلوچستان اور افغانستان میں بھی آباد ہیں۔

"بدیشی زبان" (Badeshi)، صرف تین افراد بولتے ہیں۔۔!

"ہند یورپین" (Indo-European)  زبانوں کے خاندان کی "ہند ایرانی" (Indo-Iranian) شاخ سے تعلق رکھنے والی "بدیشی زبان" کا قریبی تعلق پشتو زبان سے ہے جو شاید پاکستان میں سب سے کم افراد بولتے ہیں۔

2018ء میں BBC کو وادی سوات میں صرف تین افراد ایسے ملے جو صرف سو کے قریب الفاظ پر مشتمل "بدیشی" زبان بولتے تھے۔ ان کے بقول نو سے دس خاندان یہ زبان بولتے تھے جو اب "توروالی" زبان بول رہے ہیں۔

"ونیسی یا ونیچی" (Waneci)، پشتو زبان کی ایک بولی ہے جو پشتو سے خاصی مختلف اور بعض ذرائع کے مطابق ایک الگ زبان ہے لیکن معدومی کے خطرے سے دوچار ہے۔

"ہندایرانی" (Indo-Iranian) زبانوں کے گروپ سے تعلق رکھنے والی اس زبان کو "ترینو اور تسلگری" بھی کہا جاتا ہے جس کو پشتو زبان کی قدیم شکل بھی کہا جاتا ہے جو شمالی بلوچستان میں ترین، مشوانی اور دیگر قبائل، ہرنائی اور چوتیرہ کے علاقوں میں بولتے ہیں۔ پشتو حروفِ تہجی استعمال ہوتی ہے۔

"ونیسی یا ونیچی" (Waneci)، پشتو زبان کی ایک بولی ہے جو پشتو سے خاصی مختلف اور بعض ذرائع کے مطابق ایک الگ زبان ہے لیکن معدومی کے خطرے سے دوچار ہے۔

"ہندایرانی" (Indo-Iranian) زبانوں کے گروپ سے تعلق رکھنے والی اس زبان کو "ترینو اور تسلگری" بھی کہا جاتا ہے جس کو پشتو زبان کی قدیم شکل بھی کہا جاتا ہے جو شمالی بلوچستان میں ترین، مشوانی اور دیگر قبائل، ہرنائی اور چوتیرہ کے علاقوں میں بولتے ہیں۔ پشتو حروفِ تہجی استعمال ہوتی ہے۔