فارسی (Persian) زبان کو تقریباً آٹھ سو سال تک پاکستان (یا برصغیر پاک و ہند) کی سرکاری زبان ہونے کا اعزاز حاصل رہا ہے۔

دنیا کے سب سے بڑے "ہندیورپین" (Indo-European) زبانوں کے خاندان سے تعلق رکھنے والی "فارسی زبان" کا منبع جنوبی ایران کا علاقہ کرمان ہے۔ اصل نام "پارسی" تھا جو عرب فتوحات کے بعد "فارسی" بنا کیونکہ عربی زبان میں "پ" کا حرف نہیں ہے۔

فارسی، ایران کی اکثریتی سرکاری زبان ہے۔ افغانستان کی "دری" اور تاجکستان کی "تاجک" بھی اس کی دیگر مشہور بولیاں ہیں جبکہ "پشتو"، "بلوچی" اور "کرد" زبانیں بھی اسی فارسی خاندان سے تعلق رکھتی ہیں۔ ازبکستان میں واقع سمرقند اور بخارا جیسے تاریخی شہروں کی اکثریتی زبان اب بھی فارسی ہی ہے۔ پاکستان کی قومی زبان "اردو" پر بھی فارسی زبان کے گہرے اثرات ہیں۔

فارسی زبان کی تاریخ

"فارسی زبان" کا تعلق قدیم آریا نسل سے ہے جو ساڑھے تین ہزار سال قبل روس کےبحیرہ اسود اور بحیرہ کیسپین کے کوہ قاف کے علاقوں سے یورپ، ایران اور برصغیر پاک و ہند میں آباد ہوئی۔ "ایران" کا نام بھی اسی "آریا" نسل کی وجہ سے پڑا۔ اسی تعلق کی وجہ سے فارسی زبان کا دیگر کلاسیکل زبانوں، سنسکرت، یونانی اور لاطینی سے پرانا رشتہ ہے۔

مشہور ایرانی بادشاہ دارا (522-486ء ق م) کے دور میں بولی جانے والی قدیم فارسی زبان کے اثرات آج بھی ملتے ہیں۔ تیسری صدی قبل مسیح سے 7ویں صدی تک جو زبان بولی جاتی تھی اس کو "درمیانی فارسی" کا نام دیا گیا ہے۔ ساسانی دورِحکومت (651-224ء) میں یہ سرکاری زبان تھی اور اپنے عروج پر تھی۔ 637ء میں خلیفہ دوم حضرت عمرؓ (644-583ء) کے دور میں عربوں نے ایران کی فتوحات کا سلسلہ شروع کیا اور ستر سال میں موجودہ پورا ایران فتح کر لیا تھا۔ فارسی نے عربی رسم الخط کو دو سو سال میں اپنایا جو "جدید فارسی" کا دور کہلایا۔

فارسی زبان کے اثرات

فارسی زبان نے خود تو عربی زبان کے گہرے اثرات قبول کیے لیکن اس کا اثرورسوخ وسطی ایشیائی ریاستوں اور برصغیر پاک و ہند تک نہیں پہنچنے دیا اور قریباً ایک ہزار سال تک ایران کے علاوہ اپنے وقت کی پانچ بڑی مسلم طاقتوں یعنی غزنوی سلطنت (1186-977ء)، سلجوقی سلطنت (1194-1037ء)،، دہلی سلطنت (1526-1206ء) سلطنتِ عثمانیہ (1922-1299ء) اور مغلیہ سلطنت (1857-1526ء) کی سرکاری زبان رہی۔

جدید فارسی کی پہلی نظم افغانستان میں شائع ہوئی تھی۔ 10ویں صدی میں "روداکی" کو فارسی کا پہلا عظیم شاعر، موسیقار اور گلوکار سمجھا جاتا ہے۔ کلاسیکل فارسی ادب میں "مثنوی مولانا روم"، فردوسی کا"شاہنامہ"، عمرخیام کی "رباعیات"، "دیوانِ حافظ" اور سعدی شیرازی کی "گلستان اور بوستان" بہت بڑے فن پارے ہیں۔

جب فارسی، پاک و ہند کی سرکاری زبان تھی

افغان حکمران سلطان محمود غزنوی (1030-971ء) نے ایک ہزار سال قبل یعنی 1021ء میں لاہور کو اپنی حکومت کا حصہ بنایا تو فارسی، موجودہ پنجاب کی سرکاری، درباری اور علمی زبان قرار پائی۔ دو سو سال بعد یعنی 1206ء میں قطب الدین ایبک (1210-1150ء) کے دور میں دہلی فتح ہوا تو وہاں بھی فارسی کی اجارہ داری قائم ہوگئی جو اگلے چھ سو سال تک رہی۔ 1837ء میں انگریزوں نے فارسی کی جگہ اردو اور انگریزی کو سرکاری زبان بنایا تو بظاہر فارسی زبان کا برصغیر سے وجود ختم ہوگیا لیکن اس نے اردو زبان کی شکل میں اپنے اثرات باقی رکھے۔

فارسی کے اردو پر اثرات

19ویں صدی میں فارسی زبان کے عالمی زوال کا دور شروع ہوا۔ پہلے برصغیر سے چھٹی ہوئی پھر 20ویں صدی کے شروع میں ترکی نے بھی فارسی کو خیرآباد کہہ دیا۔ وسطی ایشیاء کی روسی ریاستوں میں بھی فارسی پر کڑا وقت آیا اور افغانستان میں پشتو کی اجارہ داری نے فارسی کو نقصان پہنچایا۔ اس کے باوجود فارسی زبان نے برصغیر پر اپنے طویل قیام کے گہرے اثرات چھوڑے اور "ہندی" کی ملاوٹ سے ایک نئی زبان "اردو" تشکیل دی جس پر فارسی شعروسخن کے بڑے گہرے اثرات ہیں۔ علامہ اقبالؒ (1938-1777ء)، فارسی زبان کے بہت بڑے شاعر تھے۔

ایک اندازے کے مطابق اردو زبان کے پندرہ سے بیس فیصد الفاظ فارسی زبان کے ہیں جبکہ پنجابی، پشتو اور بلوچی کے علاوہ متعدد پاکستانی زبانوں پر بھی فارسی کے گہرے اثرات ہیں۔

فارسی حروفِ تہجی

قدیم فارسی زبان، چھ سو سال قبل مسیح میں میخی خط (Cuneiform) میں لکھی جاتی تھی۔ تیسری صدی سے درمیانی فارسی "پہلوی، منچین اور اوستان" طرزِ تحریر میں لکھی جاتی تھی لیکن 9ویں صدی سے فارسی زبان، چار حروف "پ، چ، ژ اور گ" کے اضافے سے عربی رسم الخط میں "ابجد" طرز میں لکھی جاتی ہے یعنی الفاظ پر اعراب نہیں لکھے جاتے لیکن پڑھے جاتے ہیں۔ 1928ء سے روسی ریاستوں میں فارسی کے لیے "سیریلک" اور ترکی میں "لاطینی" رسم الخط استعمال ہوتے ہیں۔

فارسی حروفِ تہجی میں کل 32 حروف ہیں جن کا تلفظ عام طور پر اردو کی طرح ہے لیکن بعض حروف کا مخصوص تلفظ ہے جس میں "پ" کو "پھ" اور "ت" کو "تھ" پڑھا جاتا ہے۔ اسی طرح سے "چ" کو "چھ" اور "ک" کو "کھ" پڑھا جاتا ہے۔ فارسی حروفِ تہجی کی خاص بات یہ بھی ہے کہ "ق" کو "غ" کی آواز سے پڑھا جاتا ہے، اس طرح سے "آقا" اور "آغا" میں کوئی فرق نہیں ہوتا۔ اس کے علاوہ فارسی میں عربی کی طرح "بڑی یے" نہیں ہے اور حروفِ تہجی میں ہمزہ (ء) بھی نہیں ہے۔

عربی حروف، فارسی تلفظ

برصغیر پاک و ہند کی سبھی "مسلم زبانوں" کے حروفِ تہجی تو عربی زبان کے ہیں لیکن ان کا تلفظ، عربی کی بجائے فارسی زبان سے متاثر ہے۔ چند مثالیں مندرجہ ذیل ہیں:

• عربی زبان میں "الف" اور "ع" کے تلفظ میں واضح فرق ہے۔ پہلا باریک اور دوسرا موٹا پڑھا جاتا ہے لیکن اہل فارس نے ان دونوں حروف کو ایک A کی صورت دے دی۔
• عربی زبان میں "ث" کا تلفظ "تھ" کے قریب بنتا ہے جبکہ "ص" کو "س" کی نسبت موٹا پڑھا جاتا ہے لیکن فارسی زبان نے یہ تینوں حروف کو صرف S بنا دیا۔
• عربی زبان میں "ت" کو باریک مگر "ط" کو موٹا پڑھا جاتا ہے لیکن فارسی نے دونوں کو ایک ہی تلفظ بنا دیا۔
• عربی زبان میں "ح" کو موٹا اور "ہ" کو پتلا پڑھا جاتا ہے لیکن فارسی کی وجہ سے اردو وغیرہ میں بھی ان کا ایک ہی تلفظ بنتا ہے۔
• عربی زبان میں "ذ" کا تلفظ انگلش کے لفظ The میں ہے جو "دھ" کی نرم آواز ہے۔ "ض" کا تلفظ "دھ" کو موٹا کر کے پڑھنا جبکہ "ظ" کا تلفظ "تھ" کو موٹا پڑھنا ہے لیکن فارسی نے ہمیں یہ چاروں حروف "ز"، "ذ"، "ض" اور "ظ" ایک ہی تلفظ یعنی Z کی صورت میں دیے۔
• فارسی کے اپنے مخصوص حرف "ژ" کو بعض لوگ Z کی آواز سے پڑھتے ہیں جبکہ اہلِ ایران اس کو Zh سے لکھتے ہیں لیکن تلفظ "ج" یا "ی" کا ہوتا ہے۔ "جاپان" کو مثلاً فارسی میں "ژاپن" لکھتے ہیں جبکہ ہم "ویژن" میں "ژ" کو "ی" کی آواز سے پڑھتے ہیں۔
• ہمارے ہاں بہت کم لوگ "ق" اور "ک" میں فرق کرتے ہیں حالانکہ ان کے تلفظ میں واضح فرق ہے۔ "ق"، تالو میں زبان کی جڑ سے موٹا جبکہ "ک" ذرا آگے سے پتلا ادا ہوتا ہے۔ فارسی میں"ق" کو "غ" کی آواز سے بولا جاتا ہے البتہ انگلش میں Q اور C/K میں تفریق کی جاتی ہے۔
• عربی زبان کی "و" کا تلفظ انگریزی کے حرف W کا متبادل ہے جو لبوں کو گول کر کے ادا ہوتا ہے لیکن فارسی کی وجہ سے ہمارے ہاں بھی "و" کا تلفظ انگریزی حرف V کی طرح کیا جاتا ہے جو اوپر کے دانتوں کے نچلے لب سے ٹکرانے سے ہوتا ہے۔ ہمارے ہاں یہ دونوں تلفظ بولے جاتے ہیں۔

اس کے علاوہ اردو زبان کے "اسکول" اور "اسٹوڈیو" وغیرہ ٹائپ کے مشہور متنازعہ الفاظ جن سے پہلے بلاوجہ "الف" کا اضافہ کردیا جاتا ہے، اصل میں فارسی ہی سے متاثر ہیں۔فارسی میں "شیر" (جانور) اور "شیر" (دودھ) کو ایک ہی تلفظ سے پڑھا جاتا ہے کیونکہ فارسی کے پاس "ے" (بڑی یے) نہیں ہے جو "دری" زبان میں ہے۔