"بلوچی" (Balochi)، پاکستان کی چھٹی بڑی زبان ہے۔۔!

"ہندایرانی گروپ" (Indo-Iranian) سے تعلق رکھنے والی "بلوچی زبان"، پاکستان میں رقبہ کے لحاظ سے سب سے بڑے صوبہ بلوچستان کی 36 فیصد عوام کی مادری زبان ہے جو پڑوسی ممالک ایران اور افغانستان کے علاوہ ترکمانستان میں بھی بولی جاتی ہے۔

2023ء کی مردم شماری کے مطابق، پاکستان میں بلوچی بولنے والوں کی کل تعداد 81 لاکھ 17 ہزار تھی جو کل آبادی کا ساڑھے تین فیصد بنتا ہے۔ کیچ، پنجگور، ڈیرہ بگتی، بارخان، آواران، گوادر، کولہو، واشک، خاران اور صحبت پور کے اضلاع میں بلوچی بولنے والوں کی اکثریت آباد ہے۔ دنیا بھر میں ایک کروڑ کے قریب بلوچی آباد ہیں۔

بلوچی زبان کی تاریخ

بلوچی زبان کی تاریخ ، فارسی اور ایرانی سلطنت سے ملتی ہے جس کے زوال کے بعد چھوٹی چھوٹی ریاستیں وجود میں آئیں جو ہمیشہ ایک دوسرے سے نبردآزما رہیں۔ یہ علاقہ اب تین مختلف ممالک، پاکستان، ایران اور افغانستان میں تقسیم ہے اور یہاں کی بلوچی زبان (یا زبانیں)، مقامی زبانوں سے متاثر ہیں۔

بلوچی ادب

بلوچی ادب میں 15ویں صدی کا "رند دور" سب سے یادگار دور رہا جب مشہور رزمیہ اور رومانوی بلوچی داستانیں لکھی گئی تھیں۔ بلوچی زبان میں ریڈیو، ٹی وی ، اخبارات وغیرہ بھی ہیں جبکہ ایک آدھ فلم بھی بنی ہے۔

بلوچی زبان کا حروفِ تہجی

بلوچ قبائل میں شرح خواندگی انتہائی کم رہا ہے اور 19ویں صدی سے قبل بلوچی زبان لکھی نہیں جاتی تھی، بوقتِ ضرورت فارسی کا استعمال ہوتا تھا۔ انگریز دور میں پہلی بار بلوچی کو لاطینی رسم الخط میں لکھنے کی ناکام کوشش کی گئی۔ روسیوں نے بھی متعدد ناکام کوششیں کی تھیں۔

1970 کی دھائی میں بلوچی کا میعاری حروفِ تہجی تشکیل پایا جس میں عربی کے مخصوص حروف یعنی "ث، ح، خ، ذ، ص، ض، ط، ظ، ع، غ، ف اور ق" کو شامل نہیں کیا گیا تھا۔

بلوچی حروفِ ہجا کے مکمل حروف کی تعداد پر تضاد ہے البتہ مندرجہ ذیل عربی حروف کو جن بلوچی حروف سے بدلا گیا، ان کی فہرست مندرجہ ذیل ہے:

• "ث" اور "ص" کو "س" سے بدلا گیا۔
• "ح" اور "خ" کو "ھ" سے بدلا گیا۔
• "ذ"، "ض" اور "ظ" کو "ز" سے بدلا گیا۔
• "ط" کو "ت" سے بدلا گیا۔
• "ع" کو "الف" سے بدلا گیا۔
• "غ" کو "گ" سے بدلا گیا۔
• "ف" کو "پ" سے بدلا گیا۔
• "ق" کو "ک" سے بدلا گیا۔

بلوچی زبان کی بولیاں/لہجے

بلوچی زبان، پاکستان، افغانستان، ایران اور ترکمانستان کے وسیع و عریض علاقوں میں پھیلی ہوئی ہے۔ کم آبادی کی وجہ سے مختلف چھوٹے بڑے قبائل کی زبان ہے جن میں ربط کی کمی کی وجہ سے بہت سی الگ الگ بولیاں اور لہجے ہیں جو دیگر زبانوں کے اثرات سے محفوظ نہیں رہ سکے۔

پاکستان میں جغرافیائی طور پر بلوچی زبان بولنے والے تین الگ الگ حصوں میں تقسیم ہیں، مشرقی حصے میں "سلیمانی بلوچی" بولی جاتی ہے جو بگٹی اور مری قبائل کی زبان ہے جبکہ مغربی حصے میں "رخشانی بلوچی" بولی جاتی ہے جنھیں درمیان میں براہوی بولنے والے علاقے، قلات، خضدار وغیرہ الگ کرتے ہیں۔ جنوبی بلوچستان کے ساحلی علاقوں میں "مکرانی بلوچی" بولی جاتی ہے۔ ان کے علاوہ ایرانی کی علاقائی بولی "کوروشی" بھی ہے۔