"کھوار" یا "چترالی زبان" (Khowar)، "ہند آریائی" (Indo-Aryan) زبانوں کے "گندھارا یا داردک گروپ" سے تعلق رکھتی ہے جو پاکستان کے انتہائی شمال میں صوبہ خیبرپختونخواہ کے مالاکنڈ ڈویژن میں ضلع چترال کے علاوہ گلگت و بلتستان اور بالائی سوات میں بھی بولی جاتی ہے۔

کھوار کی تاریخ

"کھوار"، دو الفاظ کا مجموعہ ہے، "کھو"، چترالی قوم کا نام ہے جبکہ "وار" کے معانی "زبان" کے ہیں۔ اسی لیے اس کو "چترالی زبان" بھی کہتے ہیں۔ یہاں بولی جانے والی 14 مختلف زبانوں میں سے "کھوار" سب سے بڑی زبان ہے جو چھ لاکھ کے قریب نفوس میں سے 93فیصد چترالیوں کی مادری زبان ہے۔ "کھوار زبان" کو ذریعہ تعلیم بھی بنایا گیا ہے اور اس میں اخبارات کے علاوہ ریڈیو پروگرام بھی نشر ہوتے ہیں۔

چترال کی تاریخ

سلسلہ کوہ ہندوکش میں افغانستان کی واخان وادی سے منسلک، چترال، ایک سابق خودمختار ریاست تھی جہاں قدیم تہذیبوں کے آثار ملتے ہیں خصوصاً گندھارا اور بدھ تہذیب کی گہری چھاپ رہی۔ 1895ء میں یہاں انگریزوں کا قبضہ ہوا۔ 1947ء میں پاکستان سے الحاق کیا اور ڈوگرہ حکومت کے خلاف جنگِ کشمیر 1947/48ء میں پاکستان کے شمالی علاقہ جات خصوصاً سکردو کی فتح میں چترال سکاؤٹس نے اہم کردار ادا کیا تھا۔ 1969ء میں ریاست کی جداگانہ حیثیت ختم کر کے اس کو صوبہ خیبرپختونخواہ کے مالاکنڈ ڈویژن کا ضلع بنا دیا گیا تھا جو رقبے کے لحاظ سے صوبہ بھر کا سب سے بڑا ضلع بھی ہے۔

کھوار زبان کا حروفِ تہجی

"کھوار زبان" میں 18ویں صدی میں ایک غزل فارسی رسم الخط میں لکھی گئی جبکہ 1919ء میں پہلی کتاب کا ذکر بھی ملتا ہے جو نماز کے بارے میں لکھی گئی تھی۔ صدیوں سے لوک گیت اور قصے کہانیاں بھی اس زبان کی روایت رہی ہے۔

"کھوار زبان" کی اپنی مخصوص حروفِ تہجی 1970 کی دھائی میں تشکیل پائی جس میں 42 حروف پر اتفاق کیا گیا لیکن حروفِ تہجی کی ویب سائٹ omniglot.com پر "کھوار" زبان کے حروف کی تعداد کہیں زیادہ درج ہے۔ 2009ء میں "کھوار زبان" کو ڈیجیٹل کیا گیا۔