انگریزی (English)، قریباً دو سو سال سے پاکستان کی سرکاری زبان ہے۔۔!

"ہندیورپین" (Indo-European) زبانوں میں "جرمینک گروپ" (Germanic) سے تعلق رکھنے والی انگریزی زبان، دنیا کی سب سے بااثر زبان ہے۔

گزشتہ تین صدیوں میں جو بے مثل ترقی انگریزی زبان نے کی ہے، وہ کسی دوسری زبان نے نہیں کی۔ آج بھی دنیا کے ترقی یافتہ ممالک مثلاً برطانیہ، امریکہ، کینیڈا، آسٹریلیا اور نیوزی لینڈ وغیرہ میں مادری اور سرکاری زبان کے طور پر اور پاکستان، بھارت، کینیا، تنزانیہ، یوگنڈا، نائجریا، فلپائن، سنگاپور، جنوبی افریقہ اور زمبابوے سمیت پچاس سے زائد آزاد ممالک میں سرکاری زبان کے طور پر رائج ہے۔

قریباً 40 کروڑ افراد کی مادری زبان ہونے کے علاوہ بین الاقوامی سیاست و سفارت کاری، تجارتی، کاروباری اور قانونی معاملات، صنعت و حرفت، جدید سائنس و ٹیکنالوجی، اعلیٰ تعلیمی، فنی، عسکری اور پیشہ وارانہ مہارت، کھیل کود، ذرائع ابلاغ ، فلم، ٹی وی، ریڈیو، موسیقی اور دیگر ادبی اور سماجی سرگرمیوں کے علاوہ روزمرہ بول چال اور میل جول کی عالمی رابطہ زبان کے طور پر قریباً ڈیڑھ ارب سے زائد لوگ انگریزی زبان کا روزانہ استعمال کرتے ہیں۔

انگریزی زبان کی تاریخ

انگریز قوم، دراصل جرمن النسل لوگ ہیں جو 5ویں صدی میں برطانوی جزائر میں آباد ہوئے۔ 9ویں سے 11ویں صدی کے عرصہ میں سکنڈے نیویا کے بحری قزاقوں نے پے درپے حملے کر کے انگریزوں کو مغلوب کیا۔ رہی سہی کسر فرانسیسیوں نے پوری کر دی جب انھوں نے 1066ء میں انگلینڈ پر قبضہ کرلیا تھا۔

ذرا تصور کریں کہ اس وقت انگریزی، عام لوگوں کی جبکہ فرانسیسی، اشرافیہ کی زبان تھی۔ اس طرح سے انگریزی، جو ایک جرمن زبان تھی، اس پر لاطینی/رومن/فرانسیسی اثرات غالب آنے لگے جس نے نہ صرف اس کی ہیئت کو تبدیل کیا بلکہ زبان و بیان کے تضادات بھی پیدا کر دیے جو آج تک موجود ہیں۔

ناقدین کے مطابق، انگریزی زبان کی کوئی ایک بھی کل سیدھی نہیں کیونکہ اس کو بغیر کسی منطق کے لکھا اور بولا جاتا ہے، اس کے باوجود وہ ایک عالمی زبان ہے۔۔!

صنعتی انقلاب کا آغاز

15ویں صدی میں موجودہ انگریزی زبان کا نیا دور شروع ہوا۔ 1440ء میں پرنٹنگ پریس کی ایجاد کے بعد انگریزی زبان کی پہلی بڑی تصنیف منظرِعام پر آئی۔ اسی دور میں عثمانی ترکوں (1922-1299ء) کی اجارہ داری کی وجہ سے نئے تجارتی راستوں اور نئی دنیا دریافت کرنے کے لیے یورپین اقوام میں دوڑ شروع ہوئی۔ سپین سے مسلم اقتدار (1491-711ء) کا خاتمہ ہوا اور اگلے سال یعنی 1492ء میں امریکہ دریافت ہوا۔ 16ویں صدی میں شیکسپئر (1616-1564ء) کا جادو سر چڑھ کر بولا۔ 1604ء میں انگریزی زبان کی پہلی لغت شائع ہوئی۔1611ء میں پہلی بار بائبل اور 1649ء میں پہلی بار قرآنِ مجید کا انگلش میں ترجمہ شائع ہوا۔ 1665ء میں پہلا انگریزی اخبار The Oxford Gazette بھی منظرِعام پر آیا تھا۔

1760ء میں بھاپ سے چلنے والی مشینوں اور ٹرین کی ایجاد سے برطانیہ کے شہر مانچسٹر سے صنعتی انقلاب کا آغاز ہوا جس نے انگریزوں کو فیصلہ کن برتری دلا دی تھی۔ یہی وہ دور تھا جب انگریزوں نے 1757ء میں ہندوستان میں ملک گیری کی ہوس میں بنگال پر قبضہ کرلیا اور صرف پچاس سال کی قلیل مدت میں 1803ء میں راجدھانی دہلی پر بھی قابض ہوگئے تھے۔

انگریزی زبان کا عروج

17ویں صدی میں دنیا بھر میں برطانوی نوآبادیاتی نظام سے انگریزی زبان کا عالمی پھیلاؤ ہوا جو تمام برطانوی کالونیوں میں حاکموں، انتظامیہ، مقننہ، اشرافیہ، صنعت و حرفت، ذرائع ابلاغ اور تعلیم و تربیت کی زبان بن گئی تھی۔ اس دوران، عالمی اجارہ داری کے لیے انگریزی زبان کا مقابلہ فرانسیسی، ہسپانوی اور پرتگالی زبانوں سے رہا۔

انگریزوں نے 40 فیصد خطہ زمین پر حکومت کی ہے اور تاریخِ عالم نے آج تک برطانوی سلطنت سے بڑی کوئی سلطنت نہیں دیکھی جہاں سورج تک نہیں ڈوبتا تھا۔ انگریزی زبان کی اجارہ داری، آج بھی دنیا کے ہر کونے سے برطانوی راج کی عظمتِ رفتہ کی یاد دلاتی ہے۔

20ویں صدی میں، دوسری جنگِ عظیم (45-1939ء) کے بعد برطانوی سامراج کی جگہ امریکی سامراج نے لے لی جس نے انگریزی زبان کی بین الاقوامی اجارہ داری کو قائم رکھا۔ عالمی سیاسی،تجارتی اور عسکری برتری کے بعد ڈیجیٹل انقلاب نے انگریزی کی اہمیت کو دوچند کر دیا۔ دلچسپ بات یہ ہے کہ انگریزی زبان کو فیصلہ کن بین الاقوامی برتری 1990 کی دھائی میں حاصل ہوئی جب روسی بلاک زوال پذیر ہوا اور انٹرنیٹ نے دنیا کو ایک گلوبل ولیج بنا دیا تھا۔

انگریزی، پاکستان کی سرکاری زبان کب بنی؟

پاکستان کا قیام تو 1947ء میں عمل میں آیا لیکن اس سے قریباً ایک صدی قبل یعنی 1837ء میں انگریزوں نے فارسی کی جگہ انگریزی (اور اردو) کو ہندوستان کی سرکاری زبان بنا دیا تھا جو آج بھی، یعنی 2025ء میں 188 سال بعد بھی پاکستان کی سرکاری زبان ہے اور ابھی ایسے کوئی آثار نہیں کہ اگلے سو سال تک اس میں کوئی بڑی تبدیلی ہو۔

انگریزی زبان کا ہمارے پورے معاشرے پر کتنا گہرا اثر ہے، اس کا اندازہ عام زندگی میں بھی قدم قدم پر کیا جا سکتا ہے۔ پاکستان کے کسی بھی شہر یا قصبے کے کسی بھی بازار یا روڈ پر چلے جائیں، ہر طرف انگلش سائن بورڈز قطار در قطار نظر آئیں گے۔ اب بھلا ان انگریزی الفاظ کا اردو یا پنجابی استعمال کون کرے گا:

• "کلاتھ ہاؤس" کو "کپڑے کا گھر یا درزی خانہ"
• "جنرل سٹور" کو "عام چیزوں کی دکان" یا پنجابی میں "ملیاری والا"
• "کارپینٹر" کو "بڑھئی یا ترکھان"
• "ہیرڈریسر" کو "حجام یا نائی کی دکان" (میرے بچپن میں ایک حجام کی دکان کا نام تھا "مرکز اصلاح گیسو")
• "شوز میکرز" کو "موچی کی دکان"
• "فوٹو سٹوڈیو" کو "تصویروں کا گھر یا دکان"
• "واچ ہاؤس" کو "گھڑی ساز"
• "آٹو ورکشاپ" کو "گاڑیوں کے مستری کی دکان"
• "بس سروس" کو "گاڑی کی خدمات" یا "موٹر گاڑی والے"
• "پاکستان انٹرنیشنل ائرلائنز" کو "پاکستان عالمی ہواباز ادارہ"

انگریزی کا حروفِ تہجی

انگریزی زبان کو پہلی بار 5ویں صدی میں تحریری صورت ملی۔ یہ قدیم انگریزی کا دور تھا جس میں جرمن زبانوں کا زور تھا لیکن 11ویں صدی میں فرانسیسی قبضے کے بعد لاطینی زبان کی اجارہ داری کا دور شروع ہوا اور قدیم زبان میں بے شمار نئے الفاظ آئے۔

دورِ حاضر کی "جدید انگریزی" زبان کا آغاز 15ویں صدی میں ہوا جس میں دیگر زبانوں کے علاوہ خاص طور پر لاطینی اور یونانی الفاظ کی آمد ہوئی۔ انگریزی زبان، رومن رسم الخط استعمال کرتی ہے جو اصل میں یونانی طرزِتحریر سے ماخوذ ہے جس کا منبع "فونیشین" زبان ہے جو دنیا کی پہلی حروفِ تہجی تھی اور ہماری عربی/فارسی رسم الخط کی بنیاد بھی تھی۔ اس طرح سے "ہندیورپین" زبانوں کے خاندان سے تعلق کی وجہ سے انگریزی زبان، ہماری اردو/پنجابی وغیرہ کی دور کی رشتہ دار بھی ہے۔

انگریزی حروفِ تہجی کو Alphabet کہا جاتا ہے جو یونانی زبان کے پہلے دو حروف alpha اور beta سے بنا۔ ایسی طرزِتحریرمیں Vowels کے بغیر کوئی لفظ نہیں لکھا جا سکتا۔

انگریزی حروفِ تہجی کی چند دلچسپ معلومات

• انگریزی حروفِ تہجی (Alphabet) میں کل 26 حروف ہیں جو 44 مختلف آوازیں دیتے ہیں۔ ان میں 19 حروفِ صحیح (Consonants) اور 5 حروفِ علت (Vowels) ہیں جبکہ گاہے بگاہے Y اور W سے ان دونوں کا کام لیا جاتا ہے۔
• انگریزی میں 5 حروفِ علت (Vowels) 14 مختلف آوازیں دیتے ہیں جو تلفظ کو خاصا پیچیدہ بنا دیتے ہیں۔
• انگریزی زبان میں کوئی لفظ، Vowels کے بغیر نہیں لکھا جاسکتا مگر روایتی حروفِ علت (a,e,i,o,u) کے بغیر بھی ایک لفظ rhythms ہے جس میں Y وؤولز کا قائم مقام ہے۔
• انگریزی املا کی فضول خرچی دیکھیے کہ لفظ Queue میں کل پانچ حروف ہیں حالانکہ تلفظ صرف ایک حرف Q کا ہے۔
• انگریزی زبان کا سب سے زیادہ استعمال ہونے والا حرف E ہے جو ہر 8واں حرف یا 11 فیصد تحریر میں آتا ہے جبکہ Z کے بعد Q سب سے کم استعمال ہوتا ہے اور U کے بغیر کبھی نہیں آتا۔
• انگریزی حروفِ تہجی کے 9 حروف ایسے ہیں جو 70 فیصد عبارتوں میں آتے ہیں اور اس ترتیب سے ہیں: E,T,A,O,I,N,S,H,R
• انگریزی زبان میں سب سے زیادہ الفاظ S سے شروع ہوتے ہیں جبکہ اس کے بعد P اور C آتے ہیں۔
• عام طور پر کسی انگریزی لفظ کے آخر میں یہ تین حروف نہیں آتے: V,J,Q
• عام طور پر انگریزی املا میں C اور G کے بعد اگر a,o,u آئیں تو بالترتیب "ک" اور "گ" کی آوازیں دیتے ہیں اور اگر e,i,y کی آوازیں آئیں تو بالترتیب "س" اور "ج" کی آوازیں بنتی ہیں۔
• انگریزی الفابیٹ میں 16ویں صدی تک J,U,W کے حروف نہیں تھے جبکہ ایک 27واں حروف & (The ampersand) موجود تھا جو اب نہیں ہے۔
• انگریزی الفابیٹ میں حرف O دنیا کا سب سے پرانا حرف ہے جو پانچ ہزار سالہ قدیم مصری تصویری خط یا لوگو گرافک اور ساڑھے تین ہزار سالہ قدیم دنیا کے پہلے فونیقی حروفِ تہجی میں بھی موجودتھا۔
• اس ایک جملے میں انگریزی حروفِ تہجی کے سبھی 26 حروف آتے ہیں:
  The quick brown fox jumps over the lazy dog