سقوط مشرقی پاکستان

16 دسمبر 1971ء کے منحوس دن سقوط مشرقی پاکستان نے قوم پر سکتہ طاری کر دیا تھا۔۔!

کوئی تصور بھی نہیں کر سکتا تھا کہ ہمیں اتنی بڑی اور شرمناک فوجی شکست ہوئی ہے۔ بظاہر صرف 13 دن کی اعلانیہ جنگ تھی جو 3 دسمبر سے 16 دسمبر 1971ء تک ظاہری دشمن بھارت کے خلاف لڑی گئی تھی لیکن حقیقت میں بھارت نے 21 نومبر 1971ء کو مشرقی پاکستان پر حملہ کردیا تھا جہاں 25 مارچ 1971ء سے پاک فوج نے مکتی باہنی کے مسلح علیحدٰگی پسندوں کے خلاف "آپریشن سرچ لائٹ" شروع کر رکھا تھا۔

نو ماہ کی اس طویل خانہ جنگی کا افسوسناک انجام 16 دسمبر 1971ء کو رمنا ریس کورس گراؤنڈ ڈھاکہ میں ہوا جہاں جنرل نیازی نے جنرل اروڑہ کے سامنے ہتھیار ڈالنے کی دستاویز پر دستخظ کئے تھے۔ اس جنگ کے نتیجے میں جہاں پاکستان کی آدھی سے زائد آبادی یعنی ساڑھے چھ کروڑ شہری ، پاکستانی شہریت سے تائب ہوئے وہاں ملک کے رقبے میں بھی ڈیڑھ لاکھ مربع کلومیٹر کی کمی ہوئی تھی۔ 93 ہزار فوجی جنگی قیدی بنے تھے ، آٹھ ہزار کے لگ بھگ شہید اور 25 ہزار سے زائد زخمی ہوئے تھے۔ مغربی پاکستان کا ساڑھے پانچ ہزار مربع میل علاقہ بھی دشمن کے قبضے میں چلا گیا تھا اور پاکستان کا دفاع ، معیشت ، بین الاقوامی ساکھ اور قومی جذبہ مکمل طور پر تباہ و برباد ہو چکا تھا۔

سوال یہ ہے کہ کیا اس جنگ کے محرکات سے کبھی سبق سیکھا گیا ہے۔۔؟