بھٹو نے پولینڈ کی قرار داد پھاڑ دی؟

بھٹو نے پولینڈ کی قرار داد پھاڑ دی

15 دسمبر 1971ء کو سلامتی کونسل میں پاکستان کے نامزد نائب وزیراعظم اور وزیرخارجہ جناب ذوالفقار علی بھٹو نے ایک بڑی جذباتی تقریر کے بعد اپنے نوٹس پھاڑے اور احتجاجاً واک آؤٹ کرگئے تھے۔۔!

3 دسمبر 1971ء کو اعلانیہ پاک بھارت جنگ کے بعد جنگ بندی کی متعدد قراردادیں پیش کی گئی تھیں جنھیں روس نے ہر مرتبہ ویٹو کر دیا تھا اور صورتحال یہاں تک جاپہنچی تھی کہ 15 دسمبر 1971ء تک بھارتی فوج ، مکتی باہنی کی مدد سے ڈھاکہ کے مضافات تک جا پہنچی تھی۔ پاکستان پر عالمی دباؤ تھا کہ وہ بنگلہ دیش کی آزادی کو تسلیم کرتے ہوئے اپنی افواج کو وہاں سے نکال لے۔ ظاہر ہے کہ یہ مطالبہ کسی طور بھی تسلیم نہیں کیا جاسکتا تھا کیونکہ پاکستان کا موقف تھا کہ کھلی بھارتی جارحیت کے نتیجے میں مشرقی پاکستان کو زبردستی الگ کیا جارہا ہے جو کسی طور پر قابل قبول نہیں ہوسکتا تھا۔

15 دسمبر 1971ء کو پولینڈ نے جو قرارداد پیش کی تھی ، اس میں بھی یہی مطالبہ دھرایا گیا تھا کہ جنگ بند کی جائے اور مشرقی پاکستان کے منتخب نمائندوں کو اقتدار سونپا جائے۔ اس دوران دنیا بھر کے علاوہ پاکستان کے میڈیا میں بھی یہی رپورٹ ہورہا تھا کہ سقوط ڈھاکہ ہونے ہی والا ہے۔ پاکستان کو شکست سامنے نظر آرہی تھی اور روس ، بھارت سے حق دوستی ادا کرتے ہوئے بنگلہ دیش کے قیام تک ویٹو کا حق استعمال کرنے پر مصر تھا۔ بھٹو جیسے عظیم محب وطن لیڈر کے لیے یہ سوہان روح تھا کہ دنیا تماشہ دیکھ رہی ہے اور پاکستان دو لخت ہورہا ہے۔ عالمی میڈیا ، جیسے کہ نیویارک ٹائمز میں بھی یہ رپورٹ ہوا تھا کہ بھٹو ، جب وہ سلامتی کونسل سے واک آؤٹ کر رہے تھے تو وہ سخت طیش کے عالم میں تھے اور ان کی آنکھوں میں آنسو تھے۔۔!