ہتھیار ڈالنے کی دستاویز پر دستخط

جنرل نیازی اور جنرل اروڑا

یہ جمعرات 16 دسمبر 1971ء کا منحوس دن تھا جب سابقہ مشرقی پاکستان کے دارالحکومت ڈھاکہ کے رمنا ریس کورس میں پاکستان ایسٹرن کمانڈ کے جنرل نیازی نے بھارتی جنرل جگجیت سنگھ اروڑا اور دیگر فوجی افسران کے علاوہ بڑی تعداد میں پرجوش بنگالیوں کے ہجوم کے سامنے ہتھیار ڈالنے کی دستاویز پر دستخط کیے تھے جس سے نو ماہ کی خانہ جنگی اور بھارتی مسلح مداخلت کے بعد بنگلہ دیش کا قیام ممکن ہوا تھا۔ 16 دسمبر کو بنگلہ دیش اور بھارت میں "یوم فتح" کے طور پر منایا جاتا ہے۔

دوسری جنگ عظیم کے بعد یہ سب سے بڑی فوجی شکست تھی جس سے نہ صرف پاکستان کے 93 ہزار جنگی قیدی دشمن کی قید میں گئے بلکہ ڈیڑھ لاکھ کلومیٹر کا علاقہ بھی چھن گیا تھا۔ اس سے قبل ڈھاکہ ائرپورٹ سے فاتح جنرل اروڑا کو شکست خوردہ جنرل نیازی نے خوش آمدید کہا تھا۔

ہتھیار ڈالنے کی دستاویز کا مکمل متن اور اصل مسودہ مندرجہ ذیل ہے:

"پاکستان ایسٹرن کمانڈ نے بنگلہ دیش میں موجود تمام پاکستانی مسلح افواج کا ہندوستانی اور بنگلہ دیش فورسز کے جنرل آفیسر کمانڈنگ ان چیف لیفٹیننٹ جنرل جگجیت سنگھ اروڑا کے سامنے ہتھیار ڈالنے پر اتفاق کیا ہے۔ اس میں پاکستان کی تمام زمینی، فضائی اور بحری افواج کے ساتھ ساتھ تمام پیرا ملٹری فورسز اور سول آرمڈ فورسز بھی شامل ہیں۔ یہ افواج جہاں موجود ہیں ، وہیں لیفٹیننٹ جنرل جگجیت سنگھ اروڑہ کی کمان میں قریبی باقاعدہ دستوں کے سامنے ہتھیار ڈالیں گی۔
دستاویز پر دستخط ہوتے ہی پاکستان ایسٹرن کمانڈ ، لیفٹیننٹ جنرل جگجیت سنگھ اروڑا کے ماتحت ہوجائے گی۔ احکامات کی نافرمانی کو ہتھیار ڈالنے کی شرائط کی خلاف ورزی سمجھا جائے گا اور اس کے ساتھ مروجہ جنگی قوانین کے مطابق نمٹا جائے گا۔ کسی شک و شبہ کی صورت میں لیفٹیننٹ جنرل جگجیت سنگھ اروڑا کا فیصلہ حتمی ہو گا۔
لیفٹیننٹ جنرل جگجیت سنگھ اروڑا ضمانت دیتے ہیں کہ ہتھیار ڈالنے والے اہلکاروں کے ساتھ جنیوا معاہدے کے تحت عزت اور احترام کے ساتھ برتاؤ کیا جائے گا اور تمام پاکستانی فوجی اور نیم فوجی دستوں کی حفاظت اور بہبود کی ضمانت دی جاتی ہے۔ غیر ملکی شہریوں، نسلی اقلیتوں اور مغربی پاکستانی نژاد اہلکاروں کو لیفٹیننٹ جنرل جگجیت سنگھ اروڑا کی کمان میں فورسز کے ذریعے تحفظ فراہم کیا جائے گا۔"