20 اگست 1971ء کو پاک فضائیہ کے بیس سالہ نوجوان پائلٹ راشد منہاس نے اپنی جان کا نذرانہ دے کر ایک تربیتی طیارہ کو بھارت لے جانے کی کوشش ناکام بنا دی تھی جس پر اس بہادر ہواباز کو پاکستان کا سب سے بڑا فوجی ایوارڈ "نشان حیدر" دیا گیا تھا۔ دلچسپ بات یہ تھی کہ پاکستان کا غدار ، مطیع الرحمان جو طیارے کو اغوا کر کے جودھپور ، بھارت لے جانا چاہتا تھا ، وہ بنگلہ دیش کا ہیرو بنا اور اسے انہوں نے اپنے ملک کا سب سے بڑا فوجی ایوارڈ دیا تھا۔ اس کی لاش پینتیس سال بعد 24 جون 2006ء کو بنگلہ دیش لے جاکر پورے سرکاری اعزاز کے ساتھ دفنائی گئی تھی۔ اسے قومی ہیرو قرار دے کر اس کے نام پر ایک بیس کا نام بھی رکھا گیا جبکہ اس پر دو فلمیں بھی بنائی گئی تھیں۔

تفصیلات کے مطابق پاکستان ائر فورس کے مسرور بیس پر پائلٹ آفیسر راشد منہاس اپنی دوسری سولو تربیتی پرواز پر روانہ ہوئے۔ ابھی ان کا طیارہ رن وے پر ہی تھا کہ اسے ان کے انسٹرکٹر فلائیٹ لیفٹینت مطیع الرحمن نے روک لیا۔ وہ طیارے میں سوار ہوا اور دوسرے کنٹرول کے ذریعے طیارے پر قابض ہوگیا۔ اس نے وائر لیس کے ذریعے کراچی میں اپنے ساتھیوں کو پیغام دیا کہ وہ طیارہ اغوا کرکے بھارت لے جارہا ہے۔ راشد منہاس نے صورت حال کا اندازہ لگاتے ہوئے کنٹرول ٹاور کو اپنے طیارے کے اغوا کی اطلاع دی اور مزاحمت کرنا چاہی۔ طیارہ ٹھٹھہ کی حدود تک ہی پہنچا تھا اورتیس چالیس فٹ کی بلندی پر پرواز کررہا تھا کہ اچانک ایک دھماکے سے زمین سے ٹکرا کر تباہ ہوگیا۔ راشد منہاس نے اپنی جان دے دی تھی لیکن اپنا طیارہ دشمن کے ملک میں نہیں جانے دیا تھا۔ اس بہادری پر 29 اگست 1971ء کو صدر پاکستان جنرل یحییٰ خان نے راشد منہاس شہید کو پاکستان میں جرات اور شجاعت کا سب سے بڑا اعزاز نشان حیدر عطا کرنے کا اعلان کیا۔ وہ یہ عظیم اعزاز حاصل کرنے والے پاکستان کے چوتھے ، ائرفورس کے پہلے اور سب سے کم عمر قومی ہیرو تھے۔

راشد منہاس ، 17 فروری 1951ء کو کراچی میں پیدا ہوئے تھے۔ 1968ء میں ائرفورس کو جوائن کیا اور 13 مارچ 1971ء کو وہ پائلٹ آفیسر بن گئے تھے اور صرف بیس سال کی عمر میں 20 اگست 1971ء کو شہید ہوگئے تھے۔

405

Newspapers

339

TV/Radio

204

Web/Mag