فاطمہ جناح کی انتخابی مہم

محترمہ فاطمہ جناح اور شیخ مجیب الرحمان

2 جنوری 1965ء کو پاکستان میں ہونے والے صدارتی انتخابات میں مرکزی امیدوار اپوزیشن پارٹی کونسل مسلم لیگ کی رہنما محترمہ فاطمہ جناح نے جب 6 نومبر 1964ء کو مشرقی پاکستان (موجودہ بنگلہ دیش) کا دورہ کیا تو ان کا جگہ جگہ پرتپاک استقبال ہوا تھا۔

بنگالیوں نے ملک بھر میں والہانہ انداز میں محترمہ فاطمہ جناح کو خوش آمدید کہا تھا۔ یہاں تک کہ عوامی لیگ کے لیڈر شیخ مجیب الرحمان بھی ان کے ساتھ ساتھ رہے اور انتخابی مہم میں بھرپور تعاون کیا تھا۔ حالانکہ یہ وہی شیخ مجیب تھے جنھوں نے ایک طالب علم رہنما کے طور پر 1948ء میں قائدِاعظمؒ کی قومی زبان کے موضوع پر تقریر پر ہڑبونگ مچا دی تھی اور انھیں اپنی تقریر نامکمل چھوڑ کر جانے پر مجبور کر دیا تھا۔ بعد میں پاکستان سے علیحدگی کے سرغنہ بنے۔

پہلی مسلم خاتون صدر؟

1965ء کے صدارتی انتخابات ، بالغ رائے دہی کی بنیاد پر نہیں ہوئے تھے بلکہ صرف بلدیاتی اداروں کے 80 ہزار ممبران کو ہی وؤٹ دینے کا حق حاصل تھا۔ صدر ایوب خان ، نے یہ صدارتی انتخاب جیت لیا تھا لیکن اگر "ایک آدمی ایک وؤٹ" کی بنیاد پر عام انتخابات ہوتے تو 70 سالہ ضعیف خاتون، محترمہ فاطمہ جناح، پاکستان ہی نہیں بلکہ اسلامی دنیا کی پہلی مسلم خاتون صدر ہوتیں۔

دلچسپ بات یہ ہے کہ مذہبی حلقے عورت کی حکمرانی پر متفق نہیں تھے۔ جماعت اسلامی نے محترمہ فاطمہ جناح کا ساتھ دیا لیکن دیگر مذہبی جماعتوں نے مخالفت کی تھی۔

جاگ اٹھا ہے سارا وطن

بہت کم لوگوں کو علم ہوگا کہ 1965ء کی جنگ کا ایک مشہور زمانہ رزمیہ ترانہ "ساتھیو ، مجاہدو ، جاگ اٹھا ہے سارا وطن۔۔" اصل میں محترمہ فاطمہ جناح کی انتخابی مہم سے متاثر ہوکر لکھا گیا تھا۔

معروف شاعر حمایت علی شاعر کے لکھے ہوئے اس لازوال ترانے کی دھن موسیقار خلیل احمد نے بنائی تھی اور نمایاں آواز مسعودرانا کی تھی جن کا الاپ "ساتھیو ، مجاہدو" اس ترانے کی جان تھا۔ شوکت علی کی معاون آواز تھی جنھوں نے یہ انکشاف کیا تھا۔ اس ترانے کو فلم مجاہد (1965) میں شامل کیا گیا تھا اور جنگ ستمبر 1965ء کے دوران سب سے مقبول ترین جنگی ترانہ ثابت ہوا تھا۔