لیاقت علی خان کا دورہ امریکہ

پاکستان کے پہلے وزیراعظم نوابزادہ لیاقت علی خان اور ان کی بیگم رعنا لیاقت علی خان ، 3 مئی 1950ء کو امریکہ کے سرکاری دورے پر واشنگٹن پہنچے جہاں خود امریکی صدر ہیری ٹرومین نے ائرپورٹ پر ان کا بھر پور استقبال کیا تھا۔۔!

لیاقت علی خان کا سوا دو مہینوں کا دورہ

وزیراعظم پاکستان نوابزادہ لیاقت علی خان کو امریکی صدر کے ذاتی طیارے میں پاکستان سے لے جایا گیا تھا۔ وہ 3 مئی سے 26 مئی 1950ء تک امریکی حکومت کے سرکاری مہمان رہے۔ تین ہفتوں کے اس سرکاری دورے میں انہیں امریکہ بھر میں گھمایا پھرایا گیا اور ہر جگہ ان کا پر تپاک استقبال ہوا تھا۔ یہ معلوم نہیں کہ مہمان کو میزبان نے جس مقصد کے لیے بھلایا تھا ، وہ پورا بھی ہوا یا نہیں۔۔؟

اگلے پانچ ہفتے تک وزیراعظم پاکستان نوابزادہ لیاقت علی خان اپنی بیگم کے ساتھ امریکہ میں اپنی ذاتی حیثیت سے مقیم رہے اور 12 جولائی 1950ء کو کینیڈا اور برطانیہ سے ہوتے ہوئے وطن واپس پہنچے جہاں ان کا بھر پور استقبال کیا گیا تھا۔

لیاقت علی خان نے روس کا دورہ منسوخ کیا

اس سے قبل 8جون 1949ء کو روس کے صدر جوزف سٹالن نے وزیر اعظم لیاقت علی خان کو دورہ روس کی دعوت دی تھی۔ وہ اس پر رضامند بھی تھے لیکن سرد جنگ کے عروج کے دور میں پھر دوسرے فریق امریکہ نے انہیں دعوت دے ڈالی اور وہ روس کا دورہ منسوخ کر کے امریکہ یاترا پر روانہ ہو گئے تھے۔ پاکستان کی خارجہ پالیسی کی تشکیل میں یہ فیصلہ کن موڑ تھا۔

تاریخی واقعات کے تسلسل سے یہ نتیجہ اخذ کرنا مشکل نہیں کہ قائد ملت ، شہید ملت شاید کبھی نہ بنتے اگر وہ ، وہی شرائط مان لیتے جو بعد میں داعی انقلاب جنرل ایوب خان نے مان لی تھیں۔۔!