محمد ایوب کھوڑو

محمد ایوب کھوڑو

محمد ایوب کھوڑو ، تین بار وزیرِاعلیٰ سندھ کے عہدے پر فائز رہے۔۔!

محمد ایوب کھوڑو ، تحریکَ پاکستان کے سرگرم کارکن اور ایک قوم پرست سندھی رہنما تھے جنھیں قیامِ پاکستان کے بعد سندھ کا پہلا وزیرِاعلیٰ ہونے کا اعزاز حاصل ہے۔

انھوں نے اقتدار کی ہوس میں ون یونٹ بنوانے میں اہم مہرے کا کردار کیا اور تین بار وزارتِ اعلیٰ کے منصب کے علاوہ پہلے مارشل لاء سے قبل آخری وزیرِاعظم ملک فیروزخان نون کی حکومت میں چند ماہ کے لیے وزیر دفاع کے نمائشی عہدے پر بھی نظر آئے۔

ایوب کھوڑو کو کیوں برطرف کیا گیا؟

سندھ کے مردِآہن، محمد ایوب کھوڑو کو صرف نو ماہ بعد یعنی 16 اپریل 1948ء کو کرپشن کے الزامات پر گورنر جنرل قائدِ اعظمؒ کی ہدایت پر گورنر سندھ سر غلام حسین ہدایت اللہ نے برطرف کر دیا تھا۔ اصل میں مرکزی حکومت کے کراچی کو سندھ سے الگ کرنے اور اردو بولنے والے ہندوستانی مہاجرین کی سندھ میں آمد اور آبادکاری کے خلاف تھے اور اسی خطا کی یہ سزا تھی۔

دلچسپ بات یہ ہے کہ محمد ایوب کھوڑو کو پروڈا کے بدنامِ زمانہ قانون کے تحت سزا یافتہ ہونے اور کراچی میڈیا کی سخت مخالفت کے باوجود 25 مارچ 1951ء کو دوبارہ وزیرِاعلیٰ سندھ بنایا گیا لیکن محلاتی سازشوں کی وجہ سے 29 دسمبر 1952ء کو ایک بار پھر عہدے سے برطرف کر کے گورنر راج نافذ کر دیا گیا تھا۔

ایوب کھوڑو کی ون یونٹ کی بدنامی

ہوسِ اقتدار، محلاتی سازشوں، عدم سیاسی استحکام اور وزارتی اکھاڑ پچھاڑ کی انتہا تھی کہ جب محمد ایوب کھوڑو کو 9 نومبر 1954ء کو تیسری بار وزیرِاعلیٰ سندھ بنا کر ان سے ون یونٹ کے قیام کے لیے اسمبلی کی منظوری لی گئی تھی۔

اہلِ سندھ نے محمد ایوب کھوڑو کی یہ خطا معاف نہیں کی اور 1970ء کے عام انتخابات میں اپنے لاڑکانہ کے آبائی حلقہ سے ذوالفقار علی بھٹوؒ سے بری طرح سے ہارے اور ان کی سیاست کا ہمیشہ کے لیے خاتمہ ہوگیا تھا۔

ایوب کھوڑو کا سیاسی کیرئر

محمد ایوب کھوڑو کی پیدائش 21 جولائی 1902ء کو لاڑکانہ کے ایک نواحی گاؤں میں ہوئی جہاں سے ابتدائی تعلیم بھی حاصل کی۔ 1918ء میں سندھ مدرستہ اسلام سے میٹرک کی۔ مزید تعلیم کے لیے ڈی جے سائنس کالج کراچی میں داخل ہوئے مگر 1920ء میں اپنے والد کی وفات پر اپنے گاؤں واپس آکر زمینداری کرنے لگے اور کچھ عرصہ کے بعد عملی سیاست میں بھی حصہ لینا شروع کردیا۔

کھوڑو صاحب، 1924ء میں بمبئی لیجسلیٹو کونسل کے ممبر منتخب ہوئے جہاں پر 1936 تک رہے۔ اس دوران، سندھ محمڈن ایسوسی ایشن اور سندھ آزاد کانفرنس کے نائب صدر بھی رہے اور سندھ کو بمبئی ریزیڈنسی سے الگ کروانے میں بھرپور کردار ادا کیا۔ جب سندھ کی صوبائی حیثیت بحال ہوئی تو ایوب کھوڑو کو انتظامی کمیٹی کا ممبر بنایا گیا جسے Advisory Committee کہتے تھے جسے گورنر سندھ نے تشکیل دیا تھا۔

1937ء کے انتخابات میں سندھ اسمبلی کے ممبر منتخب ہوئے اور پہلے وزیرِاعلیٰ سندھ، سر غلام حسین ہدایت اللہ سندھ کے نائب مقرر ہوئے۔ اس دوران تحریکِ پاکستان میں بھی سرگرم ہوئے اور سندھ مسلم لیگ کے صدر کے عہدے تک پہنچے اور تامرگ اسی جماعت سے وابستہ رہے۔

محمد ایوب کھوڑو ، 1930 میں انگریزی میں Suffering of Sindh کے نام سے ایک کتاب لکھی تھی۔ سکھر سے "زمیندار" کے نام سے ایک سندھی اخبار بھی نکالتے تھے جس کے وہ مینجنگ ڈائریکٹر تھے۔ اس کے علاوہ انھوں نے ایک زمینداری بینک میں کام کیا جہاں سے آبادکاروں کو قرضہ دیا جاتا تھا۔ انگریز سرکار نے انھیں "خان بہادر" کا خطاب بھی دیا تھا۔

محمد ایوب کھوڑو 78 سال کی عمر میں 20 اکتوبر 1980ء کو کراچی میں انتقال کر گئے تھے۔