پاکستان کی دستور ساز اسمبلی کا افتتاحی اجلاس 10 اگست 1947ء کو کراچی میں سندھ اسمبلی کی موجودہ عمارت میں شروع ہوا تھا جس میں نامزد وزیر اعظم نوابزادہ لیاقت علی خان کی تجویز اور خواجہ ناظم الدین کی تائید پر اسمبلی کے غیر مسلم رکن اور نامزد وزیر قانون و محنت جوگندر ناتھ منڈل کو عارضی صدر منتخب کیا گیا تھا۔ اجلاس کا آغاز ممبر اسمبلی مولانا شبیر احمد عثمانی کی تلاوت قرآن پاک سے ہوا تھا۔

اگلے روز یعنی 11 اگست 1947ء کو دستور ساز اسمبلی کا اجلاس دوبارہ منعقد ہوا جس کی صدارت جوگندر ناتھ منڈل نے کی۔ انہوں نے اسمبلی کو بتایا کہ قائد ایوان کے انتخاب کے لیے سات ارکان نے قائداعظم محمد علی جناحؒ کو نامزد کیا ہے اور سبھی نے تائید بھی کی ہے۔ چونکہ تمام کاغذات نامزدگی درست ہیں اور کوئی مد مقابل بھی نہیں ، اس لیے قائداعظمؒ ، متفقہ طور پر دستور ساز اسمبلی کے صدر منتخب قرار پائے۔ قائداعظمؒ کے قائد ایوان منتخب ہونے کے بعد نوابزادہ لیاقت علی خان ، کرن شنکر رائے ، ایوب کھوڑو ، جوگندر ناتھ منڈل اور ابوالقاسم نے تہنیتی تقاریر کیں۔ اسی دن پاکستان کا نیا پرچم بھی منظور کیا گیا تھا۔ 14 اگست 1947ء تک جاری رہنے والے اس پہلے اجلاس میں یہ بھی طے پایا تھا کہ جب تک پاکستان کا مستقل آئین تیار نہیں ہوتا ، اس وقت تک گورنمنٹ آف انڈیا ایکٹ 1935ء کو بعض ترامیم کے ساتھ پاکستان کے آئین کی شکل دی جائے۔ بانی پاکستان قائد اعظمؒ نے جلد از جلد ایک عبوری آئین کی تیاری پر زور دیا تھا۔

پاکستان کی اس پہلی آئین ساز اسمبلی کے اراکین کا انتخاب 1945/46 کے انتخابات کے نتیجے میں عمل میں آیا تھا جس میں کل 69 اراکین تھے۔ ان میں مشرقی بنگال کے 44 ، پنجاب کے 17 ، سندھ کے 4 ، سرحد کے 3 اور بلوچستان کا ایک نمائندہ شامل تھا۔ یہ دستور ساز اسمبلی ، دستور سازی میں بری طرح سے ناکام رہی تھی۔ 24 اکتوبر 1954ء کو گورنر جنرل ملک غلام محمد نے پاکستان کی پہلی دستور ساز اسمبلی کو توڑ کر ملک میں بھر میں ہنگامی حالت نافذ کر دی تھی۔

405

Newspapers

339

TV/Radio

204

Web/Mag