پاکستان کا پہلا دن

قائداعظمؒ نے 15 اگست 1947ء کو گورنر جنرل کے عہدے کا حلف اٹھایا

15 اگست 1947ء ، پاکستان کی آزادی کا پہلا دن تھا جو ایک جمعتہ المبارک کا دن اور اتفاق سے رمضان المبارک کے متبرک مہینے میں جمعتہ الوداع کا دن بھی تھا۔۔!

پہلی حکومت نے حلف اٹھائے

اس دن پاکستان کا پہلا گزٹ جاری ہوا جو سیکریٹری جنرل چوہدری محمدعلی نے جاری کیا تھا۔ اس میں تاجدار برطانیہ کے طرف سے قائداعظمؒ محمدعلی جناحؒ کو پاکستان کے پہلے گورنر جنرل مقرر کیے جانے کا ذکر تھا۔ لاہور ہائی کورٹ کے چیف جسٹس ، جسٹس عبدالرشید نے ان سے پاکستان کے پہلے گورنر جنرل کے عہدے کا حلف لیا تھا۔ پھر قائداعظمؒ نے وزیراعظم نوابزادہ لیاقت علی خان اور پاکستان کی پہلی کابینہ کے ارکان نے بھی اپنے عہدوں کے حلف لیے تھے۔

ریڈیو پاکستان کی نشریات

پاکستان کے پہلے دن یعنی 15 اگست 1947ء کی صبح ریڈیو پاکستان لاہور کی ٹرانسمیشن کا آغاز صبح آٹھ بجے ہوا۔ پہلے سورہ آل عمران کی منتخب آیات کی تلاوت ہوئی۔ پھر انگریزی خبریں نیوز ریڈر نوبی نے پڑھیں۔ ساڑھے آٹھ بجے قائداعظمؒ کی آواز میں پہلے سے ریکارڈ شدہ ایک پیغام سنوایا گیا:

It is with feelings of greatest happiness and emotion that I send you my greetings. August 15 is the birthday of the independent and sovereign State of Pakistan. It marks the fulfilment of the destiny of the Muslim nation which made great sacrifices in the past few years to have its homeland
ترجمہ: بے حد مسرت اور احساس کے جذبات کے ساتھ میں آپ کو مبارکباد دیتا ہوں۔ 15 اگست آزاد اور خود مختار پاکستان کی پیدائش کا دن ہے۔ یہ مسلم قوم کی منزل مقصود کی علامت ہے جس نے پچھلے چند برسوں میں اپنے وطن کے حصول کے لیے عظیم قربانیاں پیش کیں۔

دیگر عہدے داران کے حلف

15 اگست 1947ء ہی کو پاکستان کے پہلے آرمی چیف General Sir Frank Messervy ، فضائیہ کے سربراہ ائر وائس مارشل Allan Perry-Keene اور بحری فوج کے سربراہ رئرایڈمرل James Wilfred Jefford نے بھی اپنے اپنے عہدوں کے حلف اٹھائے تھے۔

مشرقی بنگال کے گورنر Sir Frederick Chalmers Bourne ، مغربی پنجاب کے گورنر Sir Robert Francis Mudie ، سندھ کے گورنر شیخ غلام حسین ہدایت اللہ ، گورنر سرحد Sir George Cunningham اور بلوچستان کے چیف کمشنر Sir Geoffrey Prior نے بھی 15 اگست 1947ء ہی کو اپنے اپنے عہدوں کے حلف اٹھائے تھے۔

15 اگست 1947ء کو ہی انگریزی کے معروف روزنامہ ڈان نے کراچی سے اپنی اشاعت کا آغاز کیا تھا۔