کیبنٹ مشن پلان ، قائداعظمؒ کی ایک بہت بڑی سیاسی فتح تھی۔۔!
23 مارچ 1940ء کی قرارداد لاہور کی روشنی میں قائداعظمؒ کی قیادت میں برصغیر کے مسلمانوں کا یہ متفقہ مطالبہ تھا کہ ہندوستان کی آئینی حدود میں رہتے ہوئے ان تمام علاقوں کو مکمل صوبائی خودمختاری دی جائے ، جہاں مسلمان اکثریت میں ہیں۔ انگریز حکمرانوں نے یہ مطالبہ مان لیا تھا۔
کیبنٹ مشن پلان اگر منظور ہوجاتا تو قائداعظمؒ کو وہ سب کچھ مل جاتا ، جس کے لیے وہ ، پاکستان کے حصول کے لیے پرامن سیاسی اور قانونی جدوجہد کررہے تھے۔ پنجاب اور بنگال کی تقسیم کی نوبت نہ آتی بلکہ آسام سمیت ہندوستان کے 11 میں سے 5 غیر منقسم صوبوں میں مسلم لیگ کی حکومتیں بن جاتیں جنھیں نہ صرف مکمل صوبائی خودمختاری کی ضمات مل رہی تھی بلکہ دس سال بعد مرکز سے علیحدگی کا حق بھی دیا جارہا تھا۔ ظاہر ہے کہ یہ بات ہندو قیادت کو قابل قبول نہیں تھی جو پورے برصغیر پر اپنا اکلوتا حق سمجھتی تھی کیونکہ صدیوں بعد انھیں آزادی مل رہی تھی۔
دوسری جنگ عظیم کے بعد برطانیہ کی معاشی بدحالی کی وجہ سے ہندوستان کی آزادی کی منزل قریب تر آتی جارہی تھی۔ اسی سلسلے میں برطانوی وزیراعظم Clement Attlee نے 19 فروری 1946ءکو اپنی کابینہ کے تین وزراء پرمشتمل ایک ٹیم تشکیل دی تھی جس کا مقصد ہندوستان کو آزادی دینے کے لیے طریقہ کار طے کرنا تھا۔ اسی لیے اسے Cabinet Mission Plan کا نام دیا گیا تھا جس نے 24 مارچ 1946ء کو اپنا کام شروع کردیا تھا۔
16 مئی 1946 کو کیبنٹ مشن پلان کے تحت اعلان کیا گیا کہ ہندوستان کی وحدت کو قائم رکھا جائے گا۔ مرکزی حکومت کے پاس دفاع ، امورخارجہ اور مواصلات کے شعبے ہوں گے لیکن دیگر تمام شعبے صوبوں کے پاس ہوں گے جنھیں مکمل داخلی خودمختاری اور آئین سازی کا اختیار بھی ہوگا۔
آل انڈیا مسلم لیگ نے قائداعظمؒ کی قیادت میں 6 جون 1946ء کو کیبنٹ مشن پلان کو منظور کرلیا تھا حالانکہ 9 اپریل 1946ء کو دہلی قرارداد میں ہندوستان سے ایک الگ اور خودمختار پاکستان کا مطالبہ بھی کیا گیا تھا اور "نظریہ پاکستان" کی بڑے سخت الفاظ میں تشریح بھی کی گئی تھی۔ یہ ایک یوٹرن تھا لیکن حقیقت پسندی بھی تھی۔ قائداعظمؒ جیسا دوراندیش لیڈر دیکھ رہا تھا اگر ہندوستان کی آئینی حدود میں رہ کر آزادی ملتی ہے تو وہ ایک الگ ملک بنانے سے بدرجہا بہتر ہے۔
قائد اعظمؒ کے لچک دار موقف کے برعکس ہندو قیادت نے 25 جون 1946ء کو جواہر لال نہرو کی قیادت میں کیبنٹ مشن پلان کے پہلے حصے کو تو تسلیم کرلیا تھا لیکن دوسرے حصے یعنی دس سال بعد صوبوں کی علیحدگی کے حق کو مسترد کردیا تھا۔ قائداعظمؒ نے نہرو کے اس انکار پر ردعمل کے طور پر 29 جولائی 1946 کو مسلم لیگ کونسل کے اجلاس میں پورے منصوبے کو مسترد کرتے ہوئے 16 اگست 1946ء کو "راست اقدام" یا Direct Action کا حکم دے دیا تھا جس کا مطلب اپنی سیاسی قوت کا مظاہرہ کرنا تھا۔ قائداعظمؒ کی یہ دھمکی کام دکھا گئی اور 10 اگست 1946ء کو ہندو قیادت نے کابینہ مشن پلان کو من و عن منظور کرلیا اور منصوبے کے مطابق 2 ستمبر 1946ء کو ایک عبوری حکومت قائم ہوئی جس میں 25 اکتوبر 1946ء کو مسلم لیگ بھی شامل ہوگئی تھی۔
عبوری حکومت کی تشکیل کے باوجود وائسرائے ہند Lord Wavell ، کانگریس کو کیبنٹ مشن پلان پر عمل درآمد پر آمادہ نہ کرسکے۔ ان کی جگہ Lord Mountbatten نے لے لی تھی۔ ہندو قیادت نے سوچا کہ اگر ہمیں مستقبل میں ان پانچوں صوبوں سے ہاتھ دھونا ہی ہیں تو کیوں نہ ابھی سے جان چھڑا لی جائے۔ انھوں نے پنجاب اور بنگال کی مذہبی بنیادوں پر تقسیم کے علاوہ صوبہ سرحد اور آسام میں ریفرنڈم کا مطالبہ کردیا جو انگریزوں اور مسلم لیگ کو تسلیم کرنا پڑا۔ مسلمانوں کو اس پلان سے سخت مایوسی ہوئی تھی لیکن کوئی دوسرا حل نہیں تھا۔ بالآخر 3 جون 1947ء کو تقسیم ہند کے منصوبے کا اعلان ہوا جس کے مطابق 15 اگست 1947ء کو دو آزاد اور خودمختار ملک ، پاکستان اور بھارت ، وجود میں آئے تھے۔
منصوبے کو قابل عمل بنانے کے لیے یہ شرط بھی عائد کی گئی کہ جو سیاسی پارٹی اس پلان کو مسترد کرے گی اسے عبوری حکومت میں شامل ہونے کی دعوت نہیں دی جائے گی۔
The Cabinet Mission in 1946 was a plan to transfer of power from the British government to the Indians..
Cabinet Mission Plan (video)
Credit: British Pathé
پاک میگزین ، پاکستانی تاریخ پر اردو میں ایک منفرد ویب سائٹ ہے جس پر اہم تاریخی واقعات کو بتاریخ سالانہ ، ماہانہ ، ہفتہ وارانہ ، روزانہ اور حروفانہ ترتیب سے چند کلکس کے نیچے پیش کیا گیا ہے۔ علاوہ ازیں اہم ترین واقعات اور شخصیات پر تاریخی اور مستند معلومات پر مخصوص صفحات ترتیب دیے گئے ہیں جہاں تصویر و تحریر ، ویڈیو اور دیگر متعلقہ مواد کی صورت میں محفوظ کیا گیا ہے۔
پاکستانی فلموں کے 75 سال …… فلمی ٹائم لائن …… اداکاروں کی ٹائم لائن …… گیتوں کی ٹائم لائن …… پاکستان کی پہلی فلم تیری یاد …… پاکستان کی پہلی پنجابی فلم پھیرے …… پاکستان کی فلمی زبانیں …… تاریخی فلمیں …… لوک فلمیں …… عید کی فلمیں …… جوبلی فلمیں …… پاکستان کے فلم سٹوڈیوز …… سینما گھر …… فلمی ایوارڈز …… بھٹو اور پاکستانی فلمیں …… لاہور کی فلمی تاریخ …… پنجابی فلموں کی تاریخ …… برصغیر کی پہلی پنجابی فلم …… فنکاروں کی تقسیم ……
