آرمی چیف جنرل گل حسن

پاکستان کے چھٹے آرمی چیف …… گل حسن خان …… پاکستان کے واحد آرمی چیف تھے جو ایک فور سٹار جنرل نہیں تھے۔ اس تھر ی سٹار آرمی چیف کا عہد بھی تین ماہ سے زیادہ نہیں تھا جس کے زوال کے بارے میں متضاد اطلاعات ہیں۔ فوجی افسران اقتدار کے اس قدر عادی ہو گئے تھے کہ کسی سویلین کو حاکم تسلیم کرنا مشکل ہو گیا تھا اور وہ ایک اور فوجی بغاوت کرنا چاہتے تھے لیکن ناکام و نامراد ہوئے۔ عوام الناس کو یہ بتایا گیا تھا کہ فروری 1972ء میں پولیس ہڑتال کو ناکام بنانے کے لئے فوج کی جو مدد مانگی گئی تھی ، ایک تھرڈ کلاس جنرل نے اس سے انکار کر دیا تھا جو ہمارے بعض غیر ذمہ دار اور خود سر فوجی افسران کی مذموم ذہنیت کی ایک جھلک تھی۔ نتیجہ یہ نکلا کہ …… سول مارشل لاء ایڈمنسٹریٹر اورصدر بھٹو …… نے اس نافرمان آرمی چیف …… لیفٹیننٹ جنرل گل حسن خان …… اور دسمبر 71 ء کی جنگ میں شرمناک کارکردگی کا مظاہرہ کرنے والے …… ائر مارشل رحیم خان …… کو سزا دینے کی بجائے بالترتیب آسٹریا اور سپین میں سفیر بنا کر بھیج دیا تھا جہاں وہ پانچ سال تک مزے اڑاتے رہے تھے۔ ان کی بے ضمیری کا یہ عالم تھا کہ جب بھٹو کے خلاف 1977ء میں بدنام زمانہ جمہوریت دشمن تحریک چلی تھی تو انہوں نے بھی استعفے دے کر اس طوفان بد تمیزی میں اپنامذموم حصہ ڈالا تھا جس کا آغاز وقت کے ایک بد ترین اور بدیانت فرعون نے کیا تھا۔