پاکستان کے پہلے وزیر اعظم نوابزادہ لیاقت علی خان ، اپنے چار سالہ دور حکومت میں ملک کو کوئی آئین یا دستور تو نہ دے سکے تھے لیکن ایک قرارداد مقاصد ضرور دی تھی جو دستور ساز اسمبلی نے 12 مارچ 1949ء کو منظور کی تھی۔ اس کا مسودہ علامہ شبیر احمد عثمانی نے تیار کیا تھا۔ اس وقت متحدہ پاکستان کی پندرہ فیصد آبادی غیر مسلم تھی جس نے اس قرارداد کی سخت الفاظ میں مذمت کی تھی کیونکہ پاکستان کے شہریوں کو مسلمانوں اور اقلیتوں میں تقسیم کر کے مذہبی تعصب کی بنیاد رکھ دی گئی تھی۔ اس قرارداد کی وجہ سے قائد اعظمؒ کے نامزد کردہ پاکستان کے پہلے وزیر قانون جوگندر ناتھ منڈل اتنے بددل ہوئے تھے کہ ملک ہی چھوڑ کر چلے گئے تھے۔

قرارداد مقاصد ، آئین کا ابتدائی خاکہ تو ہو سکتی تھی متبادل نہیں۔ یہ محض زبانی جمع خرچ تھا جو دستور سازی میں غفلت کی ایک بدترین مثال تھی۔ اگر اس وقت آئین بن جاتا تو شاید آج ہماری تاریخ مختلف ہوتی۔ دستور سازی میں مشکلات کی بڑی وجہ اسمبلی میں بنگالی اراکین کی اکثریت تھی جن کی موجودگی میں جمہوری طریقے سے پاکستان کی اشرافیہ اپنی مرضی کا دستور مرتب نہیں کر سکتی تھی ، اسی لئے یہ مذہبی کارڈ کھیل کر بنگالیوں کو بے بس کرنے کی کوشش کی گئی تھی۔ یاد رہے کہ 1945/46ء کے انتخابات کے نتیجے میں وجود آنے والی اس نیم منتخب اسمبلی کو 1955ء میں گورنر جنرل ملک غلام محمد نے ایک آمرانہ حکم سے توڑ دیا تھا۔ ون یونٹ کی بنیاد پر ایک نئی اسمبلی وجود میں آئی تھی جس نے 1956ء کا آئین منظور کیا تھا اور جس کا مشرقی پاکستان کے نمائندوں نے بائیکاٹ کیا تھا۔

قرارداد مقاصد کے چند اہم نکات کچھ اس طرح سے تھے:

1. حاکمیت صرف اللہ تعالیٰ کی ہے۔ حکومت پاکستان ، اس مقدس امانت کو عوام کے منتخب نمائندوں کے ذریعے استعمال کرے گی اور اسلام کے سنہری جمہوری اصولوں پر عمل کرے گی۔
2. پاکستان کا نظام حکومت وفاقی اور طرز حکمرانی شورائی ہو گا۔ صوبوں کو خود مختاری حاصل ہو گی۔
3. عدلیہ آزاد اور انتظامیہ سے الگ ہو گی اور نظام عدل مکمل طور پر محفوظ ہو گا۔
4. اقلیتوں اور پسماندہ طبقات کے جائز حقوق ، مذہبی اور ثقافتی آزادی کا پورا تحفظ کیا جائے گا۔
5. بنیادی حقوق اور اظہار خیال کی آزادی ہو گی۔ وفاقی علاقوں کی حاکمیت ، آزادی کے علاوہ بری ، بحری اور فضائی حدود کا تحفظ کیا جا ئے گا۔ اہل ِپاکستان کی فلاح وبہبود اور ترقی و خوشحالی کے مواقع فراہم کئے جائیں گے تاکہ وہ اقوام عالم کی صف میں اپنا جائز مقام حاصل کرسکیں اور امن عالم کے قیام اور بنی نوع انسان کی ترقی میں اپنا بھر پور کردار ادا کر سکیں۔

405

Newspapers

339

TV/Radio

204

Web/Mag