دوسری آئینی ترمیم: قادیانی غیر مسلم

دوسری آئینی ترمیم
قادیانیوں کے بارے میں تھی

پاکستان کے پہلے متفقہ آئین میں دوسری ترمیم کا مسودہ حزبِ اختلاف کے سربراہ مولانا مفتی محمود (جمعیت العلمائے اسلام) نے 30 جون 1974ء کو پیش کیا تھا۔ 22 ارکان کے دستخطوں سے جاری اس مسودے میں قادیانیوں کو غیرمسلم قرار دینے کا مطالبہ کیا گیا تھا جو ختم نبوت پر یقین نہیں رکھتے۔

قادیانیوں پر الزام

قادیانیوں پر الزام تھا کہ وہ، پیغمبرِاسلام حضرت محمدﷺ کو آخری نبی نہیں مانتے اور مرزا غلام احمد قادیانی کو نبی، مہدی اور مسیح موعود سمجھتے ہیں اور ان عقائد کو نہ ماننے والوں کو کافر قرار دیتے ہیں۔ امتِ مسلمہ (جس میں سبھی مسالک شامل تھے)، ان باطل عقائد کو مسترد کرتی ہے اور قادیانیوں یا احمدیوں کو غیرمسلم قرار دینے کا مطالبہ کرتی ہے۔

قادیانیوں کا موقف

قادیانیوں کا سب سے بڑا استدلال یہ رہا ہے کہ اگر نبوت ختم ہوگئی ہے تو حضرت عیسیٰؑ دوبارہ کیسے آئیں گے؟ کیا وہ نبی نہیں ہوں گے؟ اس کے علاوہ وہ قرآنِ حکیم کے "خاتَم‌ُ النَّبیین" کو "آخری نبی" کی بجائے "نبیوں کی مہر" قرار دیتے تھے اور اسی مہر کی وجہ سے "امتی نبی" پر یقین رکھتے ہیں۔

قادیانیوں کا یہ موقف تسلیم نہیں کیا گیا کیونکہ حضرت عیسیٰؑ کوئی نئے نبی نہیں ہوں گے، اس لیے حضرت محمدﷺ کے بعد کسی نبی کی گنجائش ہی نہیں اور یہی جمہور مسلمانوں کا عقیدہ رہا ہے۔

یاد رہے کہ یہودی اور عیسائی بھی صدیوں سے مسیح موعود کے منتظر ہیں۔ انھیں یہ علم ہوجائے کہ مسیح موعود تو ایک صدی پہلے بڑی خاموشی سے آکر جا بھی چکا ہے تو وہ بھی قادیانیوں کے عقائد کا مذاق ہی اڑائیں گے۔

قومی اسمبلی کا فیصلہ

وزیرِاعظم ذوالفقار علی بھٹوؒ کی دعوت پر قومی اسمبلی میں قادیانی رہنماؤں کو اپنا موقف پیش کرنے کا بھرپور موقع ملا لیکن وہ، مسلمان علماء کے علاوہ اٹارنی جنرل یحییٰ بختیار کو مطمئن نہیں کرپائے بلکہ یہ ثابت ہوا کہ وہ غیر قادیانیوں کو کافر سمجھتے ہیں۔

دو ہفتوں کی طویل بحث و تمحیص کے بعد آئین کی دو شقوں 106 اور 260 میں ترامیم کی گئیں جنھیں قومی اسمبلی نے متفقہ طور پر منظور کرلیا اور قادیانی، غیرمسلم اقلیت قرار پائے۔ 17 ستمبر 1974ء کو صدر نے منظوری دی اور 21 ستمبر 1974ء کو دوسری آئینی ترمیم کا سرکاری گزٹ جاری ہوا۔

دوسری آئینی ترمیم کی عبارت

اسلامی جمہوریہ پاکستان کے آئین کے آرٹیکل 106 میں شق (3) میں "کمیونٹیز" کے الفاظ "قادیانی گروپ یا لاہوری گروپ" کو "احمدی" سے بدلا جائے گا۔ اس کے علاوہ آرٹیکل 260 میں شق (2) کے بعد درج ذیل نئی شق کا اضافہ کیا جائے گا:

• ایسا ہر شخص جو خاتَم‌ُ النَّبیین حضرت محمدﷺ کو بلا شک و شبہ اور صدقِ دل سے آخری نبی نہیں مانتا اور ایسے کسی بھی دعویدار کو نبی یا مذہبی مصلح مانتا ہے، آئین و قانون کے تحت مسلمان نہیں ہے۔