سر محمد ظفر اللہ خان

ظفراللہ خان
پاکستان کے پہلے باقاعدہ وزیرخارجہ تھے

سرمحمد ظفر اللہ خان ، پاکستان کے دوسرے وزیر خارجہ تھے جو لیاقت علی خان کے بعد 27 دسمبر 1947ء کو اس عہدے پر تعینات ہوئے تھے۔۔!

پاکستان کے پہلے باقاعدہ وزیر خارجہ

قیام پاکستان کے بعد سرمحمد ظفراللہ خان ، 1947 میں اقوام متحدہ میں پاکستان کے نمائندہ کی حیثیت سے کام کرتے رہے۔ اسی دوران اقوام متحدہ کی سکیورٹی کونسل کے رکن بھی رہے۔ پاکستان کی پہلی کابینہ میں وزارت خارجہ کا قلمدان وزیراعظم لیاقت علی خان کے پاس تھا لیکن اسی سال 27 دسمبر 1947ء کو سرظفراللہ خان کو پاکستان کے پہلے باقاعدہ وزیرخارجہ ہونے کا اعزاز حاصل ہوا۔ وہ اس عہدے سے 24 اکتوبر 1954ء کو مستعفی ہوئے تھے۔

اقوام متحدہ کی جنرل اسمبلی کے واحد پاکستانی صدر

پاکستان میں وزارت خارجہ کا قلمدان چھوڑنے کے بعد 1954 میں سرمحمدظفراللہ خان ، عالمی عدالت انصاف کے منصف مقرر ہوئے اور 1961 تک اس عہدہ پر فائز رہے۔ 1958 سے 1961 تک عالمی عدالت کے نائب صدر بھی رہے۔ 1961 سے 1964 تک دوبارہ اقوام متحدہ میں پاکستان کے مستقل مندوب مقرر ہوئے۔ اسی دوران 1962 سے 1964 تک اقوام متحدہ کی جنرل اسمبلی کے صدر بھی رہے۔ یہ عہدہ آج تک کسی اور پاکستانی کو نہیں ملا۔ 1964 سے 1969 تک دوبارہ عالمی عدالت انصاف میں منصف رہے۔ 1970 سے 1973 تک اسی عالمی عدالت انصاف کے صدر منتخب کئے گئے۔

پہلے ممتاز پاکستانی قادیانی

سرمحمدظفراللہ خان، 6 فروری 1893ء کو ڈسکہ ، سیالکوٹ میں ایک وکیل کے گھر پیدا ہوئے تھے۔ اپنی زندگی ہی میں مرزا غلام احمد قادیانی کے ہاتھ پر بیعت کر لی تھی۔

انھوں نے لنکن ان سے وکالت پاس کی تھی۔ 1926 میں پنجاب لیجسلیٹو کونسل کے رکن بنے۔ اسی دوران آل انڈیا مسلم لیگ میں شمولیت اختیار کی اور مسلم لیگ کے 1931 کے اجلاس منعقدہ دہلی کی صدارت کے فرائض بھی سر انجام دیئے۔ 1930 سے 1932 تک لندن میں گول میز کانفرنسوں میں شرکت کی۔ 1935 میں برطانوی ہندوستان کے وزیر ریلوے بنے۔ 1939 میں لیگ آف نیشنز میں برطانوی ہندوستان کی نمائندگی کی۔ 1942 میں چین میں برطانوی ہندوستان کے جنرل ایجنٹ رہے اور 1945 میں دولت مشترکہ کی کانفرنس میں برطانوی ہندوستان کی نمائندگی کی۔

اسی کی دھائی میں پاکستان واپسی ہوئی اور یکم ستمبر 1985 کو وفات پائی۔ ان کی تدفین احمدیہ جماعت کے مرکز ربوہ میں واقع بہشتی مقبرہ میں ہوئی۔ ان کے بارے میں یہ دعویٰ بھی کیا جاتا ہے کہ قرارداد پاکستان 1940ء کا مسودہ ان کا تیارکردہ تھا۔