روزنامہ جنگ

روزنامہ جنگ کا اجرأ میرخلیل الرحمٰن نے دوسری جنگ عظیم کے دوران 1939ء میں دہلی سے کیا تھا۔ جنگ کی خبروں میں عوامی دلچسپی کی وجہ سے اخبار کا نام "جنگ" رکھا گیا تھا۔ میرصاحب ، اخبار کی تیاری سے فروخت تک کا سارا کام خود ہی کیا کرتے تھے۔

روزنامہ جنگ کے ابتدائی شمارے

قیام پاکستان کے بعد روزنامہ جنگ کی دہلی سے اشاعت منقطع ہو گئی تھی اور بروز منگل 14 اکتوبر 1947ء سے کراچی سے شروع کر دی گئی تھی۔ ان دنوں اخبارات پر ایک دن آگے کی تاریخ درج ہوتی تھی ، اسی لیے پہلے شمارے پر 15 اکتوبر 1947ء کی تاریخ درج تھی۔

روزنامہ جنگ کا پہلا شمارہ 20x30 انچ کے نصف سائز کے چار صفحات پر مشتمل تھا۔ ہر صفحہ چھ کالموں پر مشتمل تھا اور قیمت فی شمارہ ایک آنہ یا چار پیسے تھی۔ ابتدأ میں یہ شام کا اخبار تھا لیکن بروز بدھ 4 فروری 1948 سے صبح کے اوقات میں شائع ہونے لگا تھا۔

روزنامہ جنگ کو پاکستان میں سب سے زیادہ شائع ہونے والے اردو اخبار کا اعزاز حاصل رہا ہے۔ 1955ء میں آڈٹ بیورو آف سرکولیشن کے مطابق جنگ کی روزانہ اشاعت 21.700 تھی جبکہ دوسرے نمبر پر سب سے زیادہ روزنامہ انجام کراچی چھپتا تھا جس کی روزانہ اشاعت 12.000 تھی۔ 6 ستمبر 1956 سے جنگ کی پیشانی پر ’’پاکستان بھر میں سب سے زیادہ چھپنے والا اردو روزنامہ‘‘ چھپنے لگا۔

1959ء میں پاکستان کا دارالحکومت ، کراچی سے اسلام آباد منتقل کرنے کا اعلان ہوا تو بروز جمعہ 13 نومبر 1959 کو جنگ نے عارضی دارالحکومت راولپنڈی سے بھی اشاعت کا آغاز کر دیا تھا۔ بروز پیر 15 مارچ 1971 کو لندن (برطانیہ) سے ، بروز جمعہ 31 مارچ 1972 کو کوئٹہ سے ، بروز جمعرات یکم اکتوبر1981 کو لاہور سے اور پھر بروز پیر 7 اکتوبر 2002 کو ملتان سے بھی روزنامہ جنگ کی اشاعت شروع ہوگئی تھی۔

یکم اکتوبر 1981ء کو روزنامہ جنگ نے اپنی لاہور کی اشاعت سے کمپیئوٹر کمپوزنگ کا انقلابی آغاز کیا تھا۔ اس سے قبل سبھی اردو اخبارات ہاتھ سے لکھے جاتے تھے۔ اسی ادارے نے 1967ء میں ہفت روزہ "اخبارجہاں" اور انگریزی MAG Weekly بھی شائع کیا تھا۔ انگریزی روزنامہ The News اور "جیو ٹی وی" کے علاوہ لاہور سے شائع ہونے والا اردو اخبار "آواز" بھی اسی ادارے کا ہے۔ روزنامہ جنگ ، ویب سائٹ کے علاوہ فیس بک ، ٹوئٹر ، انسٹاگرام اور یو ٹیوب پر بھی ہے۔