جسٹس قیوم کا استعفیٰ

26 جون 2001ء کو جسٹس ملک عبدالقیوم احتساب جج کے عہدے سے مستعفی ہوئے۔ 4 فروری 2001ء کے برطانوی اخبار سنڈے ٹائمز کی رپورٹ کے مطابق جسٹس قیوم نے احتساب جج کے طور پر 15 اپریل 1999ء کو سابق وزیر اعظم بے نظیر بھٹو اور ان کے شوہر آصف علی زرداری کو ایس جی ایس کوٹیکنا کیس میں پانچ سال قید ، کسی بھی سرکاری عہدے سے نااہلی اور 80 کروڑ ڈالر جرمانے کی جو سزا سنائی تھی وہ طے شدہ تھی۔ رپورٹ کے مطابق سابق وزیر اعظم نواز شریف کے حکم پر وزیر قانون خالد انور ، احتساب بیورہ کے سابق سربراہ سینٹر سیف الرحمان ، اس وقت کے لاہور ہائی کورٹ کے چیف جسٹس اور موجودہ سپریم کورٹ جج جسٹس راشد عزیز نے جسٹس قیوم پر اس کیس میں دباؤ ڈالا تھا۔18 اپریل 2001ء کو عدالت نے اپنے فیصلے میں اس واقعہ کی تصدیق کر دی تو جسٹس قیوم سمیت جسٹس راشد عزیز بھی اپنے عہدوں سے قبل از وقت ریٹائر ہو گئے تھے۔