پاکستان کے چودہویں آرمی چیف …… جنر ل اشفاق پرویز کیانی …… کا دور انتہائی پر آشوب رہا۔ مشرف کی افغان پالیسی کے نتیجے میں پاکستان میں دہشت گردی کو فروغ حاصل ہوا اور افغانستان سے شکست خوردہ طالبان ، پاکستان کے قبائلی علاقوں میں آن دھمکے۔ امریکہ کا موقف بڑا واضح رہا کہ ان دہشت گردوں کو اپنے علاقے سے بے دخل کرو یا ہمارے حوالے کرو …… ورنہ ہم خود کر لیں گے۔ یہ ایک مسلمہ اصول اور ضابطہ ہے کہ جو لوگ کسی ملک یا قوم کے لئے خطرہ ہوں، ان کی سرکوبی ان ممالک کا فرض اولین ہے۔ دنیا بھر کی جنگیں جانی اور مالی مفادات کے حصول میں ہی لڑی گئی ہیں اور ہمیشہ لڑی جاتی رہیں گی۔ جنر ل کیانی کی قیادت میں بڑی کامیابی سے جنوبی وزیرستان اور سوات میں دہشت گردوں کا صفایا کیا گیا۔البتہ اس دور میں دہشت گردوں کی ملک بھر میں پر تشدد اور بزدلانہ کاروائیاں جاری رہیں اور سب سے بڑا نشانہ پاک فوج اور پولیس رہی جن میں 10 اکتوبر2009ء کو جی ایچ کیو راولپنڈی اور 22 مئی 2012ء کو مہران بیس کراچی پر حملہ کر کے اربوں روپوں کا نقصان پہنچایا گیا۔امریکہ کے ڈرون حملے خاصے کارگر اور مفیدرہے اور بڑے بڑے دہشت گردوں کی ٹارگٹ کلنگ ہوئی۔ اس دوران …… اسامہ بن لادن …… جیسا دہشت گرد بھی پاکستان میں ہی مارا گیا جو پاکستان اور پاک فوج کی جگ ہنسائی کا باعث بنا۔ جنرل کیانی …… کا ایک شاندار کارنامہ یہ بھی ہے کہ کئی مواقع پر حکومت کا تختہ الٹنے کی ترغیب کے باوجود جمہوریت کے پاسدار رہے اورقدم قدم پر سازشی عناصر کو مایوس کرتے رہے۔
پاک میگزین ، پاکستانی تاریخ پر اردو میں ایک منفرد ویب سائٹ ہے جس پر اہم تاریخی واقعات کو بتاریخ سالانہ ، ماہانہ ، ہفتہ وارانہ ، روزانہ اور حروفانہ ترتیب سے چند کلکس کے نیچے پیش کیا گیا ہے۔ علاوہ ازیں اہم ترین واقعات اور شخصیات پر تاریخی اور مستند معلومات پر مخصوص صفحات ترتیب دیے گئے ہیں جہاں تصویر و تحریر ، ویڈیو اور دیگر متعلقہ مواد کی صورت میں محفوظ کیا گیا ہے۔ یہ سلسلہ ایک انفرادی کاوش اور فارغ اوقات کا بہترین مشغلہ ہے جو اپنی تکمیل تک جاری و ساری رہے گا ، ان شاء اللہ۔۔!
پاکستانی فلموں ، فنکاروں اور فلمی گیتوں پر ایک منفرد اور معلوماتی سلسلہ
