سلیم اقبال کی موسیقار جوڑی نے
دیساں دا راجہ اور اے راہ حق کے شہیدو
جیسے لازوال گیت تخلیق کیے تھے

پاکستانی فلمی تاریخ نے بڑے بڑے فنکار پیدا کیے تھے جن میں سے ایک بڑا نام موسیقاروں کی جوڑی سلیم اقبال کا بھی تھا۔۔!

اپنی پہلی ہی فلم شیخ چلی (1958) سے ایک سپرہٹ گیت

• سیو نی میرا دل دھڑکے۔۔

سے آغاز کرنے والے سلیم اقبال نے بہت جلد اپنا نام بڑے موسیقاروں کی صف میں شامل کروا لیا تھا جب انھوں نے فلم کرتارسنگھ (1959) جیسی شاہکار فلم کی موسیقی ترتیب دی تھی۔ اس تاریخی فلم میں نسیم بیگم اور ساتھیوں کا گایا ہوا شادی و بیاہ کا یہ گیت

• دیساں دا راجہ میرے بابل دا پیارا۔۔

تو اتنا مقبول ہوا تھا کہ ایک سدا بہار لوک گیت کا درجہ اختیار کر گیا تھا۔

اس فلم کے دیگر گیت بھی بڑے مقبول ہوئے تھے جن میں

• گوری گوری چاننی دی ٹھنڈی ٹھنڈی چھاں نی۔۔ (زبیدہ خانم)
• اج آکھاں وارث شاہ نوں ، کدے قبراں وچوں بول۔۔ (زبیدہ خانم ، عنایت حسین بھٹی)
• اج مک گئی اے غماں والی شام ، تینوں ساڈا پہلا سلام۔۔ (سلیم رضا ، عنایت حسین بھٹی مع ساتھی)

سلیم اقبال ، اردو پنجابی فلموں کے کامیاب موسیقار

سلیم اقبال نے اپنی فنی قابلیت سے نہ صرف پنجابی بلکہ اردو فلموں میں بھی اپنی دھاک بٹھا دی تھی۔ انھوں نے فلم دروازہ (1962) میں نسیم بیگم سے ایک اور شاہکار گیت گوایا تھا

• چھپ گئے ستارے ، ندیا کنارے ، تم نہ ہی آئے پیا ، تم نہ ہی آئے۔۔

اسی فلم میں انھوں نے پہلی بار غزل گلوکار استاد امانت علی خان سے میڈم نورجہاں کے ساتھ یہ کلاسیکل گیت گوایا تھا

• پیا نہیں آئے سکھی ، ان بن مورا جیا گبھرائے۔۔

فلم باجی (1963) کی موسیقی ترتیب دے کر تو سلیم اقبال نے ناقدین کو انگشت بدنداں کر دیا تھا۔ اس فلم کے بیشتر گیت کلاسیک کا درجہ رکھتے ہیں جن میں سے نسیم بیگم کا یہ گیت سب پر بھاری تھا

• چندا توری چاندنی میں جیا جلے جائے رے۔۔

اس فلم کے دیگر گیتوں میں

• سجن توری لاگی لگن من ما۔۔ (نورجہاں ، فریدہ خانم)
• دل کے افسانے ، نگاہوں کی زبان تک پہنچے۔۔
• اب یہاں کوئی نہیں آئے گا۔۔ (نورجہاں)

وغیرہ اہم گیت تھے جو پنجابی فلموں کے عظیم شاعر احمدراہی کے لکھے ہوئے تھے۔

میڈم نورجہاں کو پلے بیک سنگر کے طور پر بڑی جدوجہد کرنا پڑی

ملکہ ترنم نورجہاں کو پنجابی فلموں میں پلے بیک سنگر بننے کے لیے بڑی جدوجہد کرنا پڑی تھی۔ مقابلہ بہت سخت تھا۔ پچاس کے عشرہ میں اگر زبیدہ خانم تھی تو ساٹھ کے عشرہ میں نسیم بیگم اور مالا کا مقابلہ کرنا آسان نہ تھا۔ فلم رانی خان (1960) سے پلے بیک سنگر کا آغاز کرنے کے باوجود میڈم نورجہاں کو 1965ء کی فلم پھنے خان کے سپرہٹ گیت

• جیو ڈھولا۔۔

تک انتظار کرنا پڑا تھا۔ یہ گیت بھی سلیم اقبال کی تخلیق تھا۔

اے راہ حق کے شہیدو

مادر وطن (1966)

سلیم اقبال کی جوڑی نے فلم مادروطن (1966) میں ایک ایسا گیت تخلیق کیا تھا کہ جو آج بھی خون کو گرمانے اور روح کو تڑپانے کے لیے سنا جاتا ہے

• اے راہ حق کے شہیدو ، وفا کی تصویرو ، وطن کی ہوائیں تمہیں سلام کہتی ہیں۔۔

نسیم بیگم کی لازوال آواز میں مشیرکاظمی کے لکھے ہوئے اس گیت کو ایک قومی گیت کا درجہ حاصل ہے۔ اسی فلم میں انھوں نے میڈم نورجہاں سے یہ لاجواب گیت بھی گوایا تھا

• چل ہٹ ری ہوا ، گھونگھٹ نہ اٹھا ، میرا مکھڑا بالم دیکھے گا۔۔

سلیم اقبال اور مسعودرانا کا ساتھ

فلم رسوائی (1966) میں سلیم اقبال نے پہلی بار مسعودرانا سے ایک گیت گوایا تھا

• اے صنم دلربا ، بھول نہ جا۔۔

انھوں نے نسیم بیگم اور میڈم نورجہاں کے بعد سب سے زیادہ گیت مسعودرانا سے گوائے تھے۔ فلم یتیم (1967) کے یہ دو شاہکار گیت ان کے دو بہترین مشترکہ گیت تھے

• جہاں پھول بھی ہیں اور کانٹے بھی۔۔
• لوٹ آؤ ، ہاتھ جوڑکر کہتا ہوں ، اے میرے پیارو لوٹ آؤ۔۔

فلم میرا ویر (1967) میں بھی انھوں نے مسعودرانا یہ یہ تھیم سانگ گوایا تھا

• نیلی چھتری والیا ، میری مشکل کر آسان۔۔

سلیم اقبال کے مقبول عام گیت

اس پورے گیت کو ایک اور فلم وچھڑے رب میلے (1970) میں بھی شامل کیا گیا تھا۔ فلم میرا ویر (1967) میں سلیم اقبال کا ایک اور سپرہٹ گیت نسیم بیگم نے گایا تھا

• جدا دل ٹٹ جائے ، جدی گل مک جائے ، جنوں چوٹ لگے او جانے۔۔

سلیم اقبال نے فلم پاکیزہ (1968) میں میڈم نورجہاں سے ایک اور شاہکار گیت گوایا تھا

• لوٹ آؤ ، میرے پردیسی ، بہار آئی ہے۔۔

فلم مرادبلوچ (1968) میں بھی یہ گیت سپرہٹ تھا

• ڈھول بلوچا ، موڑ مہاراں۔۔

فلم پیا ملن کی آس (1969) میں مہدی حسن سے

• تمہیں دیکھوں ، تمہارے چاہنے والوں کی محفل میں۔۔

فلم دکھ سجناں دے (1973) انھوں نے اپنا آخری سپرہٹ گیت میڈم نورجہاں سے گوایا تھا

• سانوں نہر والے پل تے بلا کے۔۔

موسیقار سلیم اقبال نے منورظریف کی بطور ہیرو پہلی فلم اج دا مہینوال (1973) کی موسیقی بھی ترتیب دی تھی جس میں انھوں نے مسعودرانا سے پانچ گیت گوائے تھے۔

• لنگ آجا پتن چناں دا یار۔۔
• گلی گلی وچ گاندا پھردا ، اک کملا دیوانہ۔۔
• پیار نالوں پیاریے ، سرور توں نشیلیے۔۔
• میل دتا اے خدا ماہیا۔۔

جیسے خوبصورت گیت اس فلم میں شامل تھے لیکن ان پر ایک ماہیا حاوی تھا

• دوپتراناراں دے ، ربا ساڈا ماہی میل دے ، دن آگئے بہاراں دے۔۔

موسیقار بھائیوں کی اس جوڑی کے بارے میں بتایا جاتا ہے کہ ان کا انتقال 1996ء میں ہوا تھا۔

Masood Rana & Saleem Iqbal:

3 joint Online films

Masood Rana & Saleem Iqbal:

Total 11 joint films