شیخ رشید احمد

شیخ رشید احمد
کو بھٹو نے "قومی بدمعاش"
کا خطاب دیا تھا

11 دسمبر 2020ء کو پاکستان عوامی مسلم لیگ کے سربراہ شیخ رشید احمد کو پاکستان کا 38واں وزیر داخلہ بنا دیا گیا۔ اس سے قبل وہ 2018ء سے وزیر ریلوے تھے۔ وہ پہلی بار 1990ء میں وزیر کھیل بنے تھے۔ اس کے بعد صنعت ، ثقافت ، سیروسیاحت ، نوجوانان ، سمندر پار پاکستانی ، محنت اور اطلاعات و نشریات کے قلمدان بھی ان کے پاس رہے ہیں۔

"قومی بدمعاش"

شیخ رشید احمد ، 6 نومبر 1950ء کو راولپنڈی میں پیدا ہوئے تھے۔ ابتدائی تعلیم پولی ٹیکنیک کالج سے حاصل کی اور پنجاب یونیورسٹی سے قانون کی ڈگری لی تھی۔ سیاسی کیرئر کا آغاز جنرل ایوب خان کے خلاف عوامی تحریک میں کیا اور ابتداء میں بھٹو کے زبردست حامی تھے لیکن پھر ان سے شدید سیاسی اختلافات ہوئے۔ اپنی خودنوشت "لال حویلی سے اقوام متحدہ تک" میں انکشاف کرتے ہیں سابق وزیر اعظم ذوالفقارعلی بھٹوؒ ، انھیں "قومی بدمعاش" کہہ کر پکارتے تھے کیونکہ 1972ء میں بھٹو کے راولپنڈی کے لیاقت باغ میں ایک عوامی جلسہ کو درہم برہم کرنے ، انتشار پھیلانے اور گاڑیوں کو آگ لگانے کا کارنامہ شیخ رشید اور ان کے بیس پچیس ساتھیوں نے سر انجام دیا تھا۔

جرنیلی سیاستدان

1977ء کے انتخابات کے دوران ان کی گولی سے ایک شخص ہلاک ہوا ، وہ گرفتار ہوئے لیکن ضیاع حکومت نے انہیں ضمانت پر رہا کر دیا تھا۔ 1985ء میں جنرل اختر عبدالرحمان کی سفارش پر جنرل ضیاالحق کی اجازت سے غیرجماعتی انتخابات میں شرکت کی اور پہلی بار اسمبلی کے ممبر منتخب ہوئے۔ 1988ء اور 1990ء کے انتخابات میں اسلامی جمہوری اتحاد کے ٹکٹ پر پھر کامیاب ہوئے۔ 1993ء اور 1997ء میں نون لیگ کے ٹکٹ پر مسلسل چوتھی اور پانچویں مرتبہ ممبر اسمبلی منتخب ہوئے۔ جنرل مشرف کے دور میں 2002ء کے انتخابات میں آزادانہ حیثیت سے اپنے حلقہ سے مسلسل چھٹی بار کامیاب ہوئے اور پھر قاف لیگ میں شامل ہو گئے تھے۔ 2008ء کے انتخابات میں وہ پہلی بار ہارے لیکن 2013ء اور 2018ء کے انتخابات میں وہ پھر کامیاب ہوئے۔ اس دوران انہوں نے اپنی الگ سیاسی پارٹی "پاکستان عوامی مسلم لیگ" قائم کی جس کے وہ خود ہی چیئرمین ہیں جسے طنزیہ "ٹانگہ پارٹی" بھی کہتے ہیں۔

شیخ رشید احمد کو "مقتدر قوتوں کا غیر اعلانیہ ترجمان" بھی کہا جاتا ہے اور ان کے لئے "پنڈی بوائے" کا ذومعنی جملہ بھی استعمال ہوتا ہے جبکہ مخالفین انہیں "شیدا ٹلی" بھی کہتے ہیں۔ شیخ صاحب نے زندگی بھر شادی نہیں کی۔