غلام مصطفیٰ جتوئی

غلام مصطفیٰ جتوئی ، پاکستان کے پہلے نگران وزیراعظم تھے جو اس عہدہ پر 6 اگست سے 6 نومبر 1990ء تک فائز رہے۔۔!

جانبداری اور بددیانتی

1985ء میں آئین میں کی گئی 8ویں ترمیم کے تحت صدر غلام اسحاق خان نے اپنی صوابدید پر منتخب وزیراعظم بے نظیر بھٹو کی حکومت کو برطرف کیا تو اگلے انتخابات سے قبل ایک نگران حکومت قائم کی جس کے عارضی وزیراعظم کے لیے غلام مصطفیٰ جتوئی کا انتخاب ہوا تھا۔ جانبداری اور بددیانتی کا یہ عالم تھا کہ جتوئی صاحب ، نو سیاسی جماعتوں کے اسلامی جمہوری اتحاد کے سربراہ تھے جس نے 1988ء کے انتخابات میں بے نظیر بھٹو کا مقابلہ کیا تھا۔ 1990ء کے انتخابات میں نگران ہو کر بھی الیکشن لڑا اور وزارتِ عظمیٰ کے امیدوار تھے۔

جتوئی ، وزیراعظم نہ بن سکے!

جتوئی صاحب ، 1990ء کے انتخابات میں وزیراعظم بننے کی خواہش رکھتے تھے لیکن سرکاری خرچ پر اس بھٹو مخالف سیاسی اتحاد کو بنانے والوں کے لیے اس وقت "لاڈلے" نواز شریف تھے جنھیں پنجاب کی وزارت اعلیٰ سے اٹھا کر پاکستان کا وزیراعظم بنا دیا گیا تھا اور جتوئی صاحب ہاتھ ملتے رہ گئے تھے۔

جتوئی ، بھٹو کے ساتھی

جتوئی صاحب کبھی بھٹو کے قریبی ساتھیوں میں سے ایک تھے۔ 1970ء کے انتخابات میں پیپلز پارٹی کے ٹکٹ پر کامیاب ہوئے اور 1971ء میں بھٹو کابینہ میں شامل تھے۔ 1973ء میں سندھ کے وزیر اعلیٰ بنائے گئے۔ 1977ء تک اس عہدے پر فائز رہے۔ مارشل لاء کے نفاذ کے بعد تحریک بحالی جمہوریت (MRD) میں حصہ لیا اور دو بار 1983ء اور 1985ء میں گرفتار ہوئے۔ 1986ء میں بے نظیر بھٹو سے اختلافات کی وجہ سے الگ راہ اپنائی اور نیشنل پیپلز پارٹی بنائی۔ 1988ء کے انتخابات میں آئی ایس آئی کے بنائے ہوئے سیاسی اتحاد اسلامی جمہوری اتحاد میں شامل ہو گئے تھے۔

غلام مصطفیٰ جتوئی کا پس منظر

غلام مصطفیٰ جتوئی ، 14 اگست 1931ء کو نیو جتوئی ، ضلع نوشہرو فیروز ، سندھ میں پیدا ہوئے۔ کراچی گرامر اسکول سے تعلیم حاصل کی اور سینئر کیمبرج پاس کیا۔ 1952 میں بار ایٹ لاء کے لیے انگلینڈ گئے لیکن اپنے والد کی شدید بیماری کی وجہ سے ایک سال کے اندر وطن واپس آنا پڑا۔ غلام مصطفیٰ جتوئی 20 نومبر 2009ء کو لندن میں طویل علالت کے بعد 78 سال کی عمر میں انتقال کرگئے تھے۔