صوبہ سندھ

صوبہ سندھ ، آبادی کے لحاظ سے پاکستان کا دوسرا بڑا صوبہ ہے جہاں ایک لاکھ 41 ہزار مربع کلومیٹر کے علاقے میں ساڑھے پانچ کروڑ سے زائد لوگ بستے ہیں۔ کراچی ، دارالحکومت اور سب سے بڑا شہر ہے۔ سندھی اور اردو بڑی زبانیں ہیں۔

سندھ کی پہلی حکومت

قیامِ پاکستان کے بعد سندھ کی پہلی چار رکنی صوبائی حکومت نے 16 اگست 1947ء کو حلف اٹھایا تھا۔ سندھ کے پہلے وزیرِاعلیٰ کے طور پر محمد ایوب کھوڑو کا انتخاب ہوا جو وزیر داخلہ ، مالیات اور تعمیرات بھی تھے۔ پیر الہٰی بخش ، وزیرِ تعلیم ، بلدیات اور صحت تھے۔ قاضی فضل اللہ ، وزیرِ قانون ، محصولات اور جنگلات تھے۔ مسٹر غلام علی ، وزیرِ صنعت ، خوراک ، زراعت ، ماہی گیری اور سول سپلائز تھے۔

محمد ایوب کھوڑو

محمد ایوب کھوڑو

سندھ کے پہلے وزیرِ اعلیٰ ، محمد ایوب کھوڑو ، تحریکَ پاکستان کے سرگرم کارکن اور ایک قوم پرست سندھی رہنما تھے۔ صرف نو ماہ بعد یعنی 16 اپریل 1948ء کو کرپشن کے الزامات پر گورنر جنرل قائدِ اعظمؒ کی ہدایت پر گورنر سندھ سر غلام حسین ہدایت اللہ نے برطرف کیا۔ اصل میں کھوڑو صاحب ، کراچی کو سندھ سے الگ کرنے اور اردو بولنے والے ہندوستانی مہاجرین کی سندھ میں آمد اور آبادکاری کے خلاف تھے اور اسی خطا کی یہ سزا تھی۔

دلچسپ بات یہ ہے کہ محمد ایوب کھوڑو کو پروڈا کے بدنامِ زمانہ قانون کے تحت سزا یافتہ ہونے اور کراچی میڈیا کی سخت مخالفت کے باوجود 25 مارچ 1951ء کو دوبارہ وزیرِ اعلیٰ سندھ بنایا گیا لیکن محلاتی سازشوں کی وجہ سے 29 دسمبر 1952ء کو ایک بار پھر برطرف کر کے گورنر راج نافذ کر دیا گیا تھا۔

وزارتی اکھاڑ پچھاڑ اور عدم سیاسی استحکام کی انتہا تھی جب محمد ایوب کھوڑو کو 9 نومبر 1954ء کو تیسری بار وزیرِ اعلیٰ سندھ بنا کر ان سے ون یونٹ کے قیام کے لیے اسمبلی کی منظوری لی گئی۔ اہلِ سندھ نے ان کی یہ خطا معاف نہیں کی اور 1970ء کے عام انتخابات میں اپنے لاڑکانہ کے آبائی حلقہ سے ذوالفقار علی بھٹوؒ سے بری طرح سے ہارے اور ان کی سیاست کا ہمیشہ کے لیے خاتمہ ہوگیا تھا۔ 1958ء میں فیروزخان نون کی حکومت میں چھ ماہ کے لیے وزیر دفاع بھی بنائے گئے۔ 1901ء میں پیدا ہوئے اور 1980ء میں انتقال ہوا تھا۔