بھٹو کا عزم

ہماری طاقت
ہمارا اندرونی اتحاد ہوگا

پاکستان کے صدر جناب والفقار علی بھٹوؒ نے جولائی 1972ء میں اپنے مجوزہ دورہ بھارت سے پہلے ایک انٹرویو دیا جس میں انھوں نے باہمی احترام اور برابری کی سطح پر بات چیت کرنے کے عزم کا اظہار کیا۔

اس انٹرویو میں انھوں نے مزید کہا کہ گو پاکستان کو دو لخت کر دیا گیا ہے لیکن ہم برصغیر کے نقشہ پر کوئی معمولی قوم نہیں بلکہ ایک تاریخ ساز اور عظیم قوم ہیں جو چھ کروڑ افراد پر مشتمل ہے۔

ذوالفقار علی بھٹوؒ نے دعویٰ کیا کہ انھوں نے قوم کا جذبہ بلند کیا ہے۔ اس کے لیے انھوں نے منفی سیاست کی بجائے انقلاب اور اصلاحات کی بات کی ہے اور وہ پرامید ہیں کہ بھارت کے ساتھ مثبت اور تعمیری مذاکرات ہوں گے۔

جنگی قیدیوں کا دباؤ

اس سوال پر کہ بھارت کے ساتھ مذاکرات میں آپ کی پہلی ترجیح جنگی قیدیوں کی واپسی ہوگی مگر بھارتی وزیرِ اعظم اندرا گاندھی کو خدشہ ہے کہ ان قوم پرست جنونی افراد کی واپسی پر آپ پر دباؤ ہوگا کہ دشمن سے انتقام لیا جائے تو بھٹو صاحب نے بڑے اعتماد سے جواب دیا کہ کوئی مجھ پر دباؤ نہیں ڈال سکتا اور نہ ہم انتقامی جذبات رکھتے ہیں۔ ہمارے فوجی محبِ وطن ہیں اور ہم ان کے جذبات کی قدر کرتے ہیں۔ اگر مثبت پیش قدمی ہوئی تو انھیں مطمئن کیا جا سکتا ہے۔

پاکستان کی خارجہ پالیسی

پاکستان کی خارجہ پالیسی کے بارے میں ایک سوال کیا گیا جس پر بھٹو صاحب نے یہ تاریخی جملہ کہا کہ "ہماری طاقت، ہمارا اندرونی اتحاد ہوگا" جو ہماری خارجہ پالیسی میں بھی نظر آئے گا اور اس وقت میری ترجیح اندرونی اتحاد پیدا کرنا ہے۔

انھوں نے مزید کہا کہ انھیں اپنے عوام کی صلاحیتوں پر اعتماد ہے اور مختلف منصوبوں کی صورت میں پاکستان کو جرمنی کی طرح ایک ترقی یافتہ ملک بنایا جا سکتا ہے۔ اگر انھیں اگلے چار پانچ سال مل گئے، جو ان کا آئینی حق بھی ہے تو پاکستان میں بڑی تبدیلیاں لائیں گے جنھیں لوگ محسوس کریں گے۔

کیا عوام بھی تبدیلی چاہتے ہیں؟

بھٹو صاحب سے پوچھا گیا کہ کیا عوام بھی تبدیلی چاہتے ہیں؟

اس پر انھوں نے بڑے اعتماد سے جواب دیا کہ لوگ تبدیلی چاہتے ہیں۔ یہ ان کا حق ہے جس سے انھیں اب تک محروم رکھا گیا ہے۔ ہم دنیا میں ایک باعزت مقام حاصل کریں گے۔ ایسا مقام جو جرمنی نے بغیر کوئی جنگ جیتے حاصل کیا، ہم بھی ویسا ہی کریں گے۔